بۆ یەکەمجار ئێران ڤیدیۆی هێرشه موشەکییه‌كه‌ی بۆ سەر هێزەکانی ئەمریکا لە عێراق بڵاوکردەوە
دەزگاکانی راگەیاندنی ئێران بۆیەکەمجار ڤیدیۆی موشەکبارانکردنی بنکەی عەین ئەلئەسەدی تایبەت بە هێزەکانی ئەمریکایان لەرۆژئاوای عێراق بڵاوکردەوە.
لەڤیدیۆکەدا دەردەکەوێت کەژوری ئۆپەراسیۆنەکانی ئێران فەرمان دەکات بە موشەکبارانکردنی بنکەی عەین ئەلئەسەد کەدەکەوێتە پارێزگای ئەنبار و روداوەکەش وەک تەقینەوەیەکە لە بنکەکە دەردەکەوێت.
دوای ئەوەی بەرەبەیانی رۆژی سێی کانونی دووەمی ساڵی 2020 لە هێرشێکی فڕۆکە بێ فڕۆکەوانەکانی ئەمریکا لە نزیک فڕۆکەخانەی بەغدا قاسم سولەیمانی فەرماندەی فەیلەقی قودس و ئەبومەهدی موهەندیس جێگری سەرۆکی دەستەی حەشدی شەعبی کوژران، پێنج رۆژ دواتر ئێران بە موشەکبارانکردنی بنکەی عەین ئەسەد و بنکەیەکی تری ئەمریکیەکان لە هەولێر، هەڕەشەکانی بۆ تۆڵە سەندنەوە جێبەجێکرد.
هێزه‌كانی ئێران له‌كاتی ئه‌نجامدانی ئه‌و هێرشه موشه‌كیه‌دا رایانگه‌یاند، 80 سه‌ربازی ئه‌مریكا كوژراون و سه‌دانی دیكه برینداربون، به‌ڵام وەزارەتی بەرگری ئه‌مریكا ره‌تیكرده‌وه ئه‌و ژمارانه راست بێت و ئاشکرایکرد، زیاتر لە 90 سەربازیان توشی لەرینەوەی مێشک بون و زیانیان بەرکەوتوە و هیچ سەربازێک گیانی لەدەستنەداوە.
