فه‌رمانده‌یه‌كی پێشمه‌رگه: ئێران بە ناردنی چەند گولـلە تۆپ و فیشەکێک ویستیان گومانی هاندانی داعش بۆ پەلاماردانی کوردستان لەسەر خۆیان بڕەوێننەوە
هەندێک میدیای ئێرانی بۆ چەواشەکردنی راستییەکان و مێژوو چەندین کورتە فیلمیان دروست کردووە کە زۆر دوورن لە ڕاستی و تەنها مەبەستیان سوکایەتی کردنە بە هێزی پۆڵاینی پێشمەرگە و پێگەی ڕابەرایەتی کوردستان.
تیرۆرستانی داعش بە دانپێدانانی هەموو جیهان لەسەر دەستی پێشمەرگە قارەمانەکان تووشی شکست هاتن، کاتێک کە هەموو هێزەکانی عێراق و میلیشیاکانی سەر بە ئێران توشی هەرەس و داڕمان بووبوون، پێشمەرگە و گەلی کوردستان لە ژێر ڕابەرایەتی بارزانی ڕووبەڕووی هەموو پیلانە یەک لە دوای یەکەکان بوونەوە و کوردستانیان لە داعش و دوای داعشیش لە پیلانی خیانەت پاراست!
هێزەکانی هاوپەیمانان بە سەرۆکایەتی ئەمریکا و بەشداری ئەوروپا و چەندین وڵاتی تر کە سەرسام بوون بە خۆڕاگری پێشمەرگە وەک تاکە ئومێدی تێکشکاندنی داعش، هاوکاری پێشمەرگەیان کرد کە بە داخەوە ڕێگری لە زۆر لەو هاوکارییانە کرا بگەنە کوردستان!
ئێرانیش دوای ئەوەی پێشمەرگە هێرشە سەرەتاییەکانی داعشیان تێکشکاند، بە ناردنی چەند گوللە تۆپ و فیشەکێک بەشداری لەو هاوکارییە کرد بۆ ئەوەی گومانی هاندانی داعش بۆ پەلاماردانی کوردستان لەسەر خۆیان بڕەوێننەوە!
دروستکردنی ئەم کورتە فیلمانە کە گوایە ئەوان هێزی تێکشکێنەری داعش بوون زۆر دوورە لە ڕاستەیەوە، چونکە تا ئێستاش بە دەیان هەزار هێزی خۆیان نەیانتوانیوە داعش لە سوریا تێکبشکێنن، یان ڕاستتر ئەوەیە بڵێن نەیانویستووە ئەم بیانووە دەسکردە لە دەست بدەن کە بە هۆی بوونی داعش لە سوریا و عێراق بەردەوام لە هەوڵی چەوساندن و گۆڕێنی دیمۆگرافیای ناوچە سونییەکانن!
لە کاتی خۆی لە چەندین بۆنەدا سوپاسی هەموو لایەنەکان کراوە کە هاوکارییان گەیاندوەتە پێشمەرگە، بەڵام ئەگەر ئامانج لە باسکردنی ناردنی هاوکاری بۆ شکاندنی کەرامەتی نەتەوەیی و سەروەریمان بێت، پێویستە ئێران و سەرکردایەتییان درک بەو ڕاستییە بکەن کە سەرۆک بارزانی پێشمەرگە ڕۆژ لە دوای ڕۆژ لە دڵ و دەروونی هەموو تاکێکی کوردی بەشەرەف گەورەتر دەبێت، بە درۆکردن کەس نابێتە پاڵەوان، پاڵەوانەکانیش بە قسەی بێ مانا لەکەدار نابن!
ئەگەر ڕژێمی ئێران بۆ ڕۆژێکیش خەمی کورد و کوردستانیان لەبەرچاو بووایە هەموو ڕۆژ کۆمەڵێک گەنجی کوردیان لە سێدارە نەدەدا!
ئەگەر بە ڕاست شەڕی داعشیان کردووە بۆچی سەرکردەکانی داعش لە ئێران دەحەسانەوە؟!
بۆچی داعش بە تەنها ماڵی سوننەکانی وێران کرد و کاتێک گەیشتە نزیک بەغداد وەستان و پەلاماری کوردستانیان دا؟!
ئەرێ کەسێک نیە بڵێت ئەو داعشەی ئێرانییەکانیان بە مەجوسی ناودەبرد ڕۆژێکیش و بۆ چرکەیەکیش ڕووی چەکەکانیان نەکردە ئێران؟!
مێژوو ڕاستی بە چیرۆک و کورتە فیلم ناگۆڕدرێت و سەرۆک بارزانی و هێزی پێشمەرگەش تاکە پارێزەری کوردستان بوون و دەبن، ئیرادەی خەڵکی کوردستان بە هیچ پیلان و هێزێک ناچەمێت..
