محەمەد حەلبووسی سەردانی کوەیت دەکات
دوای ئەوەی شەوی رابردوو سەرۆکی پەرلەمانی عێراق بەسەردانێکی فەرمی گەیشتە وەڵاتی کوەیت، بڕیارە ئەمڕۆ دووشەممە پرسی پەیوەندییەکانی نێوان هەردوو وەڵات لەگەڵ ئەمیر و جێنشینی ئەمیری ئەو وڵاتەدا تاوتوێ بکات.
نوسینگەی راگەیاندنی سەرۆکی پەرلەمانی عێراق بڵاویکردەوە، شەوی رابردوو محەمەد حەلبوسی سەرۆکی پەرلەمان بەسەرۆکایەتی شاندێکی پەرلەمان گەیشتە کوەیت و لەلایەن مەرزوق غانم، سەرۆکی ئەنجومەنی گەلی ئەو وڵاتەوە پێشوازی لێکراوە.
عێراق و کوەیت سەرەڕای تێپەڕبونیان بەچەند قۆناغێکی ناکۆکی لەپەیوەندییەکانی نێوانیان بەتایبەت لەکۆتاییەکانی سەدەی رابردو، بەڵام لەدوای گۆڕینی سیستەمی حکومڕانی لەدوای ساڵی 2003ەوە پەیوەندیی نێوان هەردوولا گەشەی بەرچاوی بەخۆیەوە بینیوە.
