باڵیۆزی نۆروێژ داوای رێککەوتن نێوان هەرێمی کوردستان و بەغدا دەکات
نێچيرڤان بارزانى سەرۆکی هەرێمی کوردستان له كۆبوونه‌وه‌يه‌كدا له‌گه‌ڵ خاتوو تۆن ئالێرس باڵيۆزى نۆروێژ له عێراق، جه‌ختى له پێويستيى ئاواره و په‌نابه‌ران له هه‌رێمى كوردستان به به‌رده‌وامي هاوكاريى كۆمه‌ڵگه‌ى نێوده‌وڵه‌تى كرده‌وه و سوپاسى يارمه‌تي مرۆيى و هاوكارييه‌كانى نۆروێژى بۆ ئاواره و په‌نابه‌ران كرد، باڵيۆزى نۆروێژيش پابه‌نديى وڵاته‌كه‌ى به به‌رده‌واميى يارمه‌تيدانى مرۆيى بۆ عێراق و هه‌رێمى كوردستان دووپات كرده‌وه و هه‌ردوولا هاوڕا بوون كه بۆ تێكشكاندنى يه‌كجاره‌كيى داعش، عێراق و هه‌رێمى كوردستان هێشتا پێويستييان به پشتگيريى كۆمه‌ڵگه‌ى نێوده‌وڵه‌تى هه‌يه.
له كۆبوونه‌وه‌يه‌كدا كه پاشنيوه‌ڕۆى ئه‌مڕۆ يه‌كشه‌ممه 2021/1/31 له هه‌ولێر به‌ڕێوه چوو، دۆخى ئاواره و په‌نابه‌ران له كه‌مپه‌كانى هه‌رێمى كوردستان، هه‌نگاوه‌كانى گفتوگۆى هه‌ولێر ـ به‌غدا بۆ چاره‌سه‌ركردنى كێشه‌كانيان، ڕێككه‌وتنى حكوومه‌تى فيدرالى عێراق و حكوومه‌تى هه‌رێمى كوردستان بۆ ئاساييكردنه‌وه‌ى دۆخى شه‌نگال، دۆخى ناوچه‌كانى مادده‌ى سه‌د و چلى ده‌ستوور، پرسى بودجه‌ى گشتيى عێراق و پشكى هه‌رێمى كوردستان، هه‌ڵبژاردنه‌كانى داهاتووى عێراق، كرده‌وه تيرۆرستييه‌كانى ئه‌م دواييه له عێراق، سه‌رهه‌ڵدانه‌وه‌ى داعش و هۆكاره‌كانى، پێشهات و په‌ره‌سه‌ندنه‌كانى ناوچه‌كه به‌گشتى تاوتوێ كران.
سه‌رۆكی هەرێمی کوردستان جه‌ختى له ئاماده‌يى و خواستى هه‌رێمى كوردستان بۆ چاره‌سه‌ركردنى ته‌واوى كێشه‌كان له‌گه‌ڵ حكوومه‌تى فيدراڵى عێراق له‌سه‌ر بنه‌ماى ده‌ستوور و گرنگيى جێبه‌جێكردنى سيستمى فيدراڵى كرده‌وه كه زامنى ئارامى و سه‌قامگيرى و پێكه‌وه‌ژيانى پێكهاته‌كانى عێراق ده‌بێت، هه‌روه‌ها له‌مباره‌يه‌وه ڕۆڵى يارمه‌تيده‌رى نه‌ته‌وه يه‌كگرتووه‌كان و كۆمه‌ڵگه‌ى نێوده‌وڵه‌تى به گرنگ له قه‌ڵه‌م دا.
