به‌بۆنه‌ى كۆتاييهاتنى سه‌ردانى پاپا سه‌رۆكى هه‌رێمى كوردستان پەیامێكی بڵاوكردەوە
به‌بۆنه‌ى كۆتاييهاتنى سه‌ردانى پاپا بۆ هەرێمی كوردستان و عێراق ئەمڕۆ دووشەممە نێچیرڤان بارزانی، سه‌رۆكى هه‌رێمى كوردستان پەیامێكی بڵاو كردەوە .
نێچیرڤان بارزانی، سه‌رۆكى هه‌رێمى كوردستان له‌سه‌ره‌تاى په‌يامه‌كه‌يدا ده‌لێ :”به ڕێز و پێزانينێكى گه‌وره‌وه له سه‌ردانه‌كه‌ى قه‌داسه‌تى پاپا بۆ عێراق و هه‌رێمى كوردستان ده‌ڕوانين كه وێڕاى ناله‌باريى دۆخه‌كه، سوور بوو له‌سه‌ر ئه‌نجامدانى سه‌ردانه‌كه‌ى. پڕ به دڵ سوپاسيان ده‌كه‌م. ستايشى قه‌داسه‌تيان بۆ كولتوورى پێكه‌وه‌ژيان و لێبورده‌يى له كوردستان مايه‌ى سه‌ربه‌رزى و شانازيمانه.
نێچيرڤان بارزانى ده‌شلێت :” زۆر سوپاسى هه‌موو پێكهاته ئايينى و نه‌ته‌وه‌يييه‌كانى كوردستان ده‌كه‌م كه به د‌ڵگه‌رمييه‌كى زۆره‌‌وه به‌شدارييان له ڕێوڕه‌سمى پێشوازى و ميوانداريكردنى قه‌داسه‌تى پاپادا كرد، به‌تايبه‌تى به‌ڕێزان مامۆستايان و كه‌سايه‌تيى ئايينيى موسڵمان و هه‌موو ئايين و ئايينزاكانى ديكه‌ى كوردستان و عێراق. ئه‌وان وێنه‌يه‌كى جوانى شارستانيى ڕه‌سه‌ن و ڕاسته‌قينه‌ى پێكهاته‌كانى گه‌لى كوردستان و كولتوورى لێبورده‌يى و پێكه‌وه‌ژيان و برايه‌تييان نيشانى هه‌موو جيهان دا.
سه‌رۆكى هه‌رێمى كوردستان ڕاشيگه‌ياندووه :” بۆ تيمارى زامه‌كانى جه‌نگ و توندتيژى له عێراق، هه‌روه‌ك له قوداسى هه‌ولێردا قه‌داسه‌تى پاپا گوتيان چاره‌سه‌ر “ته‌نها لێبورده‌يى و به‌خشنده‌يى و ميهربانييه كه هه‌ر ئه‌وه‌ش خواستى خوايه له مرۆڤه‌كانى. ڕاسپارده‌ى يه‌زدان بۆ ئێمه بوونى دڵيكى بێگه‌رده، بێگه‌رد له كينه، بێگه‌رد له دووبه‌ره‌كى و هه‌ڵخه‌ڵه‌تاندن و ئاره‌زووى تۆڵه‌كردنه‌وه”، به پێچه‌وانه‌وه تونڕۆيى و تۆڵه‌كارى وه‌ك قه‌داسه‌تيان فه‌رموويان “له گێژاوێكى بێكۆتاييدا نغرۆمان ده‌كات”.
لە بەشێكی تری پەیامەكەدا هاتووە :” ئێمه له هه‌رێمى كوردستان به هه‌موو شێوه‌يه‌ك پشتگيرى له په‌يامى قه‌داسه‌تيان بۆ ئاشتى، لێبورده‌يى، پێكه‌وه‌ژيان، يه‌كترقبووڵكردن، سڕينه‌وه‌ى ڕقوكينه، توندڕه‌وى، تيرۆر و تۆڵه‌سه‌ندنه‌وه ده‌كه‌ين. ئه‌و چه‌مك و به‌هايانه بنه‌ماى سه‌‌ره‌كيى كۆمه‌ڵگه‌ى كوردستانن و وه‌ك هه‌ميشه پارێزگارييان لێده‌كه‌ين. هيوادارم له عێراق و هه‌رێمى كوردستانيش به گيانى ئه‌و په‌يام و به‌هايانه كێشه و ناكۆكييه‌كان چاره‌سه‌ر بكه‌ين.
له‌كۆتايى په‌يامه‌كه‌ى سه‌رۆكى هه‌رێمى كوردستان هاتووه :” سوپاسى هه‌ماهه‌نگيى نێوان حكوومه‌تى فيدراڵى عێراق و حكوومه‌تى هه‌رێمى كوردستان و هه‌موو ئه‌و لايه‌نه په‌يوه‌ندارانه ده‌كه‌م كه وايانكرد ئه‌و سه‌ردانه مێژوويييه له ئاستێكى به‌رزدا له‌ڕووى پرۆتۆكۆلى و ڕێكخستن و ئاسايشه‌وه، شايسته و به ڕێكوپێكى به‌ڕێوه بچێت.
