مه‌سرور بارزانی ئاماده‌ین بۆ رێككه‌وتن له‌گه‌ڵ به‌غدا به پێی ده‌ستور
سەرۆکوەزیرانی هەرێمی کوردستان لە تویتێکدا پاڵپشتیی خۆی بۆ بانگەوازی مستەفا کازمی، سەرۆکوەزیرانی عێراق دەردەبڕێت کە داوای گفتوگۆی نیشتمانیی نێوان لایەنەکانی عێراقی کردبوو بۆ چارەسەری ریشەیی هەموو کێشە و ناکۆکییەکان.
لە تویتەکەی مەسرور بارزانی، سەرۆکوەزیرانی هەرێمی کوردستاندا هاتووە، “بە ناوی حکومەتی هەرێمی کوردستانەوە پێشوازی و پشتیوانی له بانگه‌وازی سه‌رۆکوه‌زیرانی حکومەتی فیدرال، مستەفا کازمی ده‌که‌م بۆ گفتوگۆی نیشتمانیی نێوان لایه‌نه عێراقییەکان لەپێناو چارەسەری ریشەیی هەموو کێشە و ناکۆکییەکان”.
لە تویتێکی دیکەدا، سەرۆکوەزیرانی هەرێمی کوردستان ئامادەیی هەرێمی کوردستانی بۆ رێککەوتن دەربڕیوە و ئاماژەی بەوە کردووە، “ئامادەیی خۆمان دەردەبڕین بۆ رێککه‌وتن و چارەسەری بنەڕەتی و یه‌کجاریی هەموو کێشەکانی نێوان حکومەتی فیدراڵی و هەرێمی کوردستان به پێی بنەماکانی ده‌ستوور”.
