باڵیۆزی ژاپۆن لە عێراق بۆ سهرۆك بارزانى : وڵاتەكەم خوازیارە پەیوەندییەكانی لەگەڵ هەرێمی كوردستان پەرە پێ بدات لە بوارە جیاجیاكان
![](https://xwakurk.com/wp-content/uploads/2021/03/سهرۆك-بارزانى-3.jpg)
ڕۆژی سێشەممە 16ـی ئاداری 2021 لە سەلاحەددین سەرۆك مەسعود بارزانی پێشوازی لە سوزوكی كوتارو باڵیۆزی ژاپۆن لە عێراق كرد.
لە دیدارەكەدا باڵیۆزی ژاپۆن لە عێراق سەرسامی خۆی بە سەقامگیری و پێشكەوتنەكانی هەرێمی كوردستان دەربڕی و ئاماژەی بەوەدا كە ئەو سەقامگیرییەی هەرێمی كوردستان یارمەتیدەرە بۆ ئەوەی ڕێكخراو و كۆمپانییە ژاپۆنییەكان بتوانن بە باشی و بێ گیروگرفت لە كوردستان كار و چالاكییەكانیان ئەنجام بدەن.
هەروەها جەختیشی لەوە كردەوە كە وڵاتەكەی خوازیارە پەیوەندییەكانی لەگەڵ هەرێمی كوردستان پەرە پێ بدات لە بوارە جیاجیاكان بە تایبەت بواری كشتوكاڵ و كارەبا.
لای خۆیەوە سەرۆك بارزانی سوپاسی گەل و حكوومەتی ژاپۆنی كرد بۆ ئەو یارمەتیانەی پێشكەشی هەرێمی كوردستانیان كردووە و هیوای فراوانتربوونی پەیوەندییەكانی نێوان هەردوولای خواست.
پەیوەست بە بارودۆخی سیاسی و دوا پێشهاتەكانی ناوچەكە هەردوولا جەختیان لە دیالۆگ و ڕێكاری ئاشتیانە بۆ چارەسەركردنی قەیران و كێشەكان كردەوە.
![](https://xwakurk.com/wp-content/uploads/2021/03/161109186_815969818997284_7523992321694479437_o-300x164.jpg)
![](https://xwakurk.com/wp-content/uploads/2021/03/161322341_815969758997290_4861589242106314193_o-300x166.jpg)