پارێزگارى هه‌ولێر : ئەگەر هاووڵاتيان و گەشتیاران بەمجۆرە بەردەوامبن و سەیرانگەکان نەپارێزن،ناچارى رێوشوێنی پێویست و پێبژاردن ده‌بين
ئەمڕۆ یەکشەممە پارێزگای هەولێر بە بەشداریی سەرجەم فەرمانگە پەیوەندیدارەکانی وەکو شارەوانی و گەشتوگوزار و ژینگەپارێزی هەڵمەتێکی نیشتمانی بۆ پاککردنەوەی سەیرانگەکانی شاره‌كه راگەیاند و داوا لە هاووڵاتیان و گەشتیاران دەکات لە دوای خۆیان پاشماوەکانتان کۆبکەنەوە.
ئومێد خۆشناو، پارێزگاری هەولێر لە کۆنگرەیەکی رۆژنامەوانیدا لەبارەی به‌رێوه‌چوونى هەڵمەتەکە گوتى: “ئێمە بەر لەوەی ئەو هەڵمەتانە رابگەیێنین کۆمپانیاکانی پاککردنەوە بەشدارن و ئەوان ئەرکی پاکوخاوێن راگرتنی سەیرانگەکان و شوێنەکانیان لە ئەستۆدایە، بەڵام ئامانجی سەرەکیمان ئەوەیە بە هاووڵاتیانی شارەکەمان و بەو گەشتیارانە بڵێین کە دێنە سەیرانگەکان چۆن ئامادەکاری دەکەن بۆ ئەوەی گەشت و سەیرانێکی خۆش بکەن، بەهەمان شێوەش ژینگەپارێزی بکەن”.
ئومێد خۆشناو گوتيشى: “بەداخەوە ئێمە لە رۆژانی جەژنی نەورۆز زۆر بەباشی هەستمان پێکرد، سەرەڕای ئەو پلانەی لە هەموو فەرمانگەکان دانرابوو، پلانەکە وەکو خۆی لە قەزا و ناحیەکان و تەواوی سنوورەکە جێبەجێ بوو، تەنیا دوو خاڵی جێگەی سەرنج و رەخنە و گلەییە، یەکێکیان خۆپارێزیی هاووڵاتیان لە گەشت و سەیرانەکان تایبەت بە بابەتی کۆرۆنا، ئەوەی دیکەیان پاک رانەگرتنی ئەو شوێنانەی کە گەشت و سەیرانی تێدا ئەنجامدرا”.
پارێزگارى هه‌ولێر : ئەگەر گەشتیاران بەمجۆرە بەردەوامبن و سەیرانگەکان نەپارێزن،پەنا ده‌بەینە بەر سزادان و پێ بژاردن
خۆشناو له كۆنگره رۆژنامه‌وانييه‌كه‌يدا زياتر گوتيشى “کاتێک گەشت و سەیران دەکەن، تکایە ئەو شوێنەی لێی واتە رەزامەندبوون و دڵخۆشبوونی تۆیە لەو جێگایەی هەڵیدەبژێری بۆ ئەوەی گەشت و سەیرانی لێ بکەی، تکایە لەدوای خۆشت ئەو خۆشییە تێک مەدە پاشماوەکانی خۆت کۆبکەوە بەشێک بە لەوەی ژینگە و پاک و خاوێنی سەیرانگەکان بپارێزی چونكه وەکو حکومەتی هەرێمی کوردستان نامانەوێت پەنا ببەینە بەر سزادان و پێ بژاردن، بەڵام ئەگەر بێت و گەشتیاران بەمجۆرە بەردەوامبن و سەیرانگەکان نەپارێزن، ناچار دەبین رێوشوێنی پێویست و پێبژاردن لە بەرامبەر ئەو گەشتیارانە بگرینەبەر، هیوادارین هۆشیاری ئەوان بەشێکی گرنگ بێت لە پارێزگاریکردن لە سەیرانگەکان”.
