وەزارەتى دەرەوەى ئەمریکا: پێشمەرگە و ئەمریکا و عێراق و هاوپەیمانی نێودەوڵەتی سەرکەوتنی زۆریان لە رووبەڕووبوونەوەی “داعش” بەدەستهێناوە
یاریدەدەری وەزیری دەرەوەی ئەمریکا بۆ کاروباری رۆژهەڵاتی ناوەڕاست بە وەکالەت ده‌لێ:” پێشمەرگە و ئەمریکا و عێراق و هاوپەیمانی نێودەوڵەتی سەرکەوتنی زۆریان لە رووبەڕووبوونەوەی “داعش” بەدەستهێناوە.
جۆی هود، یاریدەدەری وەزیری دەرەوەی ئەمریکا بۆ کاروباری رۆژهەڵاتی ناوەڕاست بە وەکالەت، لە لێدوانێکیدا بۆ کەناڵی “ئەلحوڕە”ی ئەمریکی جەختی کردەوە،” حکوومەتی عێراق دوێنێ چوارشەممە لە میانی گفتوگۆی ستراتیجی نێوان بەغدا و واشنتن داوای کشانەوەی هێزەکانی ئەمریکای لە عێراق نەکردووە.
هاوکات، هود روونیشی کردەوە، پێشمەرگە و ئەمریکا و حکوومەتی عێراق و هاوپەیمانی نێودەوڵەتی دژ بە “داعش” سەرکەوتنی زۆریان لە رووبەڕووبوونەوەی رێکخراوی تیرۆریستیی “داعش” و هەڵوەشاندنەوەى سیستەمەکەى بەدەستهێناوە.
ناوبراو ئەوەشی درکاند، “شکستهێنانی تەواو لە دژی داعش بەدەست نەهاتووە و پێویستە بەیەکەوە لە دژیان بجەنگین”.
جۆى هود،ئەوەشی خستەڕوو، “رازیبووین لەسەر ئەوەی لیژنە تەکنیکی و سەربازییە هابەشەکان کۆببنەوە بۆ بەردەوامیدان بە گفتوگۆکان بەمەبەستی دیاریکردنی تێکەڵەیەکی گونجاو لە هێزەکانی ئەمریکا و هاوپەیمانی نێودەوڵەتی کە دەبێت لەو وڵاتە بمێننەوە بۆ تەواوکردنی ئەرکەکە”.
سەبارەت بە جەختکردنەوەی بەرپرسەکانى عێراق، لەوەى کە ئەمریکا بەڵینی داوە بە نەبوونی هیچ بنکەیەکی سەربازیی ئەمریکی لە عێراقدا، گوتی، ئێمە بنکەی سەربازیمان لە عێراق نییە. هاوکات، هێزە سەربازییەکانمان لەوێ لەنێو بنکە سەربازییەکانی عێراقدا نیشتەجێن و ئێمە میوانین لەو وڵاتەدا.
