جوان حەسەن: ژمارەی داعش لەنێو کەرکووك گەلێک زۆربووە.
ئەندامێکی ئەنجومەنی پارێزگای کەرکووک لەسەر لیستی برایەتی گوتی، بەھۆی ئەو ھێزانەی لە کەرکووک ھەن کۆنترۆڵی ئەمنیەتیی کەرکووک زۆر لاوازە و بەوھۆیەوە داعش لەناو کەرکووک و لە دەرەوەش زۆر بەھێز بووە، بۆیە ئەگەر ئەمنیەتی ناوشار نەدرێتە ھێزەکانی کەرکووک و دەرەوەش نەدرێتە پێشمەرگە و سوپا چاوەڕێی ھەموو کارێک دەکرێت کە لەلایەن داعش لە کەرکووک بکرێت.
جوان حەسەن، ئەندامی ئەنجومەنی پارێزگای کەرکووک لەسەر لیستی برایەتی، به ماڵپەڕی فەرمیی پارتی دیموکراتی کوردستانى راگه‌ياندووه: “لە سنووری کەرکووک دوو بیرە نەوت تەقێندراونەتەوە و ھێرشی سەر سەرۆکی نوێنەرایەتیی کەرکووکی لیژنەی ئۆڵمپیادی کوردستان کراوە و کەلوپەلی ماڵەکەیان دزێوە و تا ئێستاش کەس خۆی بە بەرپرسیار نەزانیوە، بەڵام جموجۆڵی داعش بە جۆرێک زۆر بووە ئێستا شانە نوستووەکان لەناو کەرکووکیش بەخۆ کەوتوون و کردەوە تیرۆریستی دەکەن.”
جوان حەسەن راشيگه‌ياندووه: “ئێستا داعش وای لێ ھاتووە ڕۆژ نییە لە ماڵێک چەکداری داعش دەستگیر نەکرێت کە بۆ کاری تیرۆریستی و کاری تێکدان ھاتوون، بۆیە ژمارەکانی داعش لەناو کەرکووک گەلێک زۆر بووە و لە دەوروبەری کەرکووک پێشتریش تەواو نەببوون و ھەر مابوون، بەتایبەت لە سنووری حەویجە و دەوروبەری، چونکە خۆیان وەکو ئاوارە ناساند، بۆیە داعش ماون لە دەرەوە و ناوشار، ئەوەی لە ناوشار کار دەکات شانەی نوستووە و ئەوەی دەرەوە چەکداری داعش بەئاشکرا دەیکەن.”
له دواى خيانه‌تى 16 ى ئۆكتۆبه‌رى سالى 2017 ه‌وه شارى كه‌ركووك به باره‌دۆخێكى نائاساييدا تێپه‌رده‌بێت و تيرۆرستانى داعش به‌هۆى لاوازى هێزه ئه‌منييه‌كان له خۆرێكخستنه‌وه‌دان له سنووره‌كه‌و رۆژانه كارى تيرۆرستى ئه‌نجام ده‌ده‌ن له سنوورى شاره‌كه
حەسەن باسی لەوەش کردووه: “ئەو دوو ڕووداوەی ڕووشیان داوە ھەر کاری داعشە، چونکە کەرکووک کۆنترۆڵی لە ڕووی ئەمنییەوە زۆر لاوازە و ئەگەری چاوەڕوانکراوی ھەموو کارێکی لێ دەکرێت، بۆیە باشترین چارەسەر ئەوەیە ئەو سنوورە فراوانەی لە نێوان ھێزەکان ھەیە پڕ بکرێتەوە و بۆ کۆنترۆڵی شار جارێکی تر ھاوپەیمان بێن و لیژنەیەکی ئەمنی دروست بکرێت و دەسەڵاتی ناوشار بدرێتەوە ھێزەکانی کەرکووک، ئەوان شارەزای کەرکووک و بارودۆخەکەن و دەرەوەی کەرکووکیش بدرێتە پێشمەرگە و سوپا بۆ ئەوەی ڕێگری بکرێت لە دزەکردنی داعش و کاری تیرۆریستی، چونکە ئەو ھێزەی ئێستا شارەزاییان لە ناوچەکە نییە.”
لە شارى کەرکووک ھەردوو بیرە نەوتی ژمارە ١٤٥ و ١٥٩ لە کێڵگەی بایحەسەن لە ڕۆژئاوای کەرکووک بە بۆمبی چێندراو تەقێندرانەوە و لە ناوچەی شوانیش حەوت چەکدار بە جلوبەرگی سەربازییەوە ھێرشیان کردووەتە سەر ماڵی نەوزاد قادر، سەرۆکی نوێنەرایەتیی کەرکووکی لیژنەی ئۆڵمپیی کوردستان لە ناوچەی شوان و بە زۆر ئۆتۆمبێلێک و بڕێک پارە و ھەندێک کەلوپەلی دیکەیان لێ دزیوە و ڕایان کردووە.
