كوڕە گەورەی بابەشێخ پەشیمانە لە سەردانەكەی بۆ ئێران داوای لێبوردن دەكات

خواكوڕك
دوای ئەوەی شاندێك بە ناو ئێزیدی سەردانی وڵاتی ئێرانیان كرد, سەردانەكە لە لایەن میری ئێزیدیان و خەلكی شنگاڵ بووە جێگەی نیگەرانی, سەرۆكی ئەو شاندەی چونەتە ئێران داوای لێبودرن دەكەن‌و دەلێت:” من هەڵەبووم و پەلەم كرد”. هاوكات جەختیشی لەسەر ناسنامەی كوردبوونی ئێزدییەكان و خەباتیان لە پێناو كوردایەتیدا كردەوە”

سەمیر بابە شێخ كە دەكاتە كوڕی گەورەی بابەشێخی ئێزدییەكان لە روونكردنەوەیەكیدا كە كۆپیەكی دەستی (خواكوڕك) دەلێت:” پێش هەر روونكردنەوەیەك، داوای لێبوردن لە هەموو ئەو دۆست و هەڤاڵانە دەكەم، كە بە هۆی سەفەری ئێرانەوە دڵیانم ئێشاندبێت. بە راستی زۆر پرسیار لە بارەی بەشداری ئێمە لەو شاندەی كە بە ناوی ئێزدییەكان لە بەغداوە چوونە ئێران درووست بوون.
هەروەها كوڕە گەوەری بابەشێخ لە بەشێكی دیكەی رونكردنەوەكەی دەنوسێت: ” بۆ ئەوەی هیچ گومان و دوو دڵییەك لەسەر هەڵوێستی ئێمە درووست نەبێت، دەڵێم من بۆ كاری تایبەتی خۆم سەردانی بەغدام كردبوو بۆ ئەوەی سەردانی باڵیۆزخانەی ئەڵمانیا بكەم و لەبەغدا گرووپێك ئێزدیم بینیی كە دەیانویست بچنە ئێران و زۆر داوایان لێكردم لەگەڵیان بچم و سەرەڕای ئەوەی من زۆرتر بایەخ بە كاری كۆمەڵایەتی و ژیانی رۆژانەی ئێزدییەكان دەدەم، شاندەكە بە منیان وت بۆ كارێكی مرۆیی و روونكردنەوەی ئێش و ئازاری ئێزدییانە بۆ دەسەڵاتدارانی ئێران و مێژوو و ئاین و باوەڕی ئێزدییەكان دەخەینەڕوو”.

دەقی روونكردنەوەكەی سەمیر بابەشێخ

سەمیر بابەشێخ لە روونكردنەوەكەیدا بە روونی دانی بەوەدا ناوە هەڵەی كردووە و نووسیویەتی: “دان بەوەدا دەنێم كە پەلەم كرد و هەڵەشم كرد و لەبەر دوو هۆكار: یەكەمیان: پێكهاتەی شاندەكە لەو ئاستە نەبوون و ئێزدیی ئەوان بە نوێنەری خۆیان نازانن و دووەمیش: نە لە لایەن حكومەتی هەرێم و نە لە ئەنجوومەنی رووحانی و نە لە بابە شێخیش مۆڵەتم وەرنەگرتبوو. هەموو لایەك بزانن ئێمە هیچ كاتێك خیانەت لە كوردستان ناكەین”.
رەنگە هەندێك كەسی ناو شاندەكە ناو و ئامادەبوونی ئێمەیان بۆ مەبەستی تایبەتی خۆیان و زیان گەیاندن بە كوردستان بە كار هێنابێت، بەڵام ئێمە هیچ جارێك خیانەت لە نیشتمانی خۆمان ناكەین و قبووڵ ناكەین زیان بە پەیوەندی بە هێزی ماڵباتی ئێمە و سەرۆكی كوردستان بگات. هەروەها قبوڵیش ناكەین ئاسایشی هەرێمی كوردستان بكەوێتە مەترسییەوە و هەر كارێك زیان بگەیەنێت بە ماڵباتی ئێمە و كوردایەتی، بۆ ئێمە هێڵی سوورە”.
ماڵباتی ئێمە سەربڵندە بە پێشەنگی كوردایەتی و كولتووری كوردستانی و هەر لە دێرزەمانی باپیرانمانەوە و لە مێژووی نوێشدا باپیری ئێمە بابەشێخ حاجی ئیسماعیل یەكەم كەس بوو لەگەڵ مەلا ئەنوەری مائی یەكەم شانەی حزبی هیوایان لە بادینان و ئێزدیخان پێكهێنا و مێژووی دەڤەرەكەش گەواهی ئەو راستییە دەدات كە پشكی ماڵباتی ئێمە لە خەبات و بەرخودان و زیندان و نەفیكردن و كۆچپێكردن و ئاوارەیی چەند بووە لە لایەن دەزگاكانی رژێمی بەعسەوە و ئێمە قوربانییەكی زۆر و شەهیدی قارەمانی زۆرمان بەخشیوە. سەرەڕای ئەوەش ئێمە رۆژگارێك سازشمان لەسەر كوردبوونی خۆمان نەكردووە و شانازیمان پێوە كردووە، باپیری ئێمەش بابە شێخ حاجی ئیسماعیل هەڤاڵی نزیكی بارزانی نەمر بووە”.
شەهید ئیدریس بارزانی و كاك مەسعوود بارزانی لە دەستپێكی رێككەوتنی ئاداری (1970) بە نوێنەرایەتی بارزانی نەمر سەردانی ماڵی ئێمەیان كرد و پەیوەندی نێوان بارزانی نەمر و ماڵباتی ئێمە زۆر بوو. بۆ بەڵگەی كوردستانی بوونی ماڵباتی ئێمەش تەنیا بەسە ئەوە بڵێین كە باپیری ئێمە لە سەرژمێری 1977 دا داوای لە خوا كردووە بمرێت پێش ئەوەی خۆی بە عەرەب تۆمار بكات. بۆیە رایدەگەیەنم بۆ هەموو دۆستەكانمان و پشتڕاست بن ئێمە بەردەوام دەبین بۆ خزمەتی ئێزدیایەتی و كوردستان”.
شایەنی گوتنە , 24/1/ 2017، شاندێكی كوردانی ئێزدی شنگال و دەورووبەری لەگەڵ راوێژكاری رێبەری كۆماری ئیسلامی ئێران كۆبوونەوە، بۆ درووستكردنی پارێزگایەك بۆ ئێزدییەكان داوای پشتیوانیان لە ئێران كرد. شاندەكە، لەگەڵ عەلی ئەكبەر ویلایەتی راوێژكاری رێبەری كۆماری ئیسلامی ئێران بۆ سیاسەتی دەرەوە كۆبوونەوە. شاندەكە پێكھاتبوو لە نوێنەری ئێزدییەكان لەناو حەشدی شەعبی و یاریدەدەری وەزیری دەرەوەی عێراق و ژمارەیەك كەسایەتی دیكەی كوردی ئێزدی.