سه‌رۆكى هه‌رێمى كوردستان له‌گەڵ شاندێکی باڵاى سه‌ربازيى به‌ریتانیا کۆبووەوە
بە گوێرەی راگەیەنداوێکی سەرۆکایەتی هەرێمی کوردستان، لە کۆبوونەوەیەکدا دوایین پێشھاتەکانی شەڕی دژی تیرۆر و مەترسییەکانی سەرھەڵدانەوەی داعش، جموجووڵی چەکداری و چۆنیەتیی رووبەڕووبوونەوەی ھەڕەشەکانی، ئەرکی ھاوپەیمانیی نێودەوڵەتیی دژی داعش لە عێراق و ھەرێمی کوردستان، یارمەتی و ھاوکاریی بەریتانیا و ھاوپەیمانیی نێودەوڵەتی بۆ بەھێزکردنی سیستمی بەرگریی عێراق بە ھەرێمی کوردستانیشەوە، پتەوکردنی ھاوبەشی و ھاریکاریی زیاتری سەربازیی بەریتانیا و ھاوپەیمانیی نێودەوڵەتی لەگەڵ عێراق و ھەرێمی کوردستان تاوتوێ کران.
دەقی راگەیێندراوی سەرۆکایەتیی هەرێمی کوردستان:
ئێواره‌ی ئه‌مڕۆ سێشه‌ممه ٢٠١٢/٥/٤ به‌ڕێز نێچیرڤان بارزانی، سه‌رۆكى هه‌رێمى كوردستان پێشوازی له به‌ڕێز مارشاڵ سامی سامپسۆن گه‌وره ڕاوێژکاری به‌رگریی به‌ریتانیا بۆ ڕۆژهه‌ڵاتی ناوه‌ڕاست و باڵیۆزی به‌ریتانیا له عێراق و شاندێکی یاوه‌ریان کرد.
له كۆبوونه‌وه‌يه‌كدا دوايين پێشهاته‌كانى شه‌ڕى دژى تيرۆر و مه‌ترسييه‌كانى سه‌رهه‌ڵدانه‌وه‌ى داعش، جموجووڵى چه‌كدارى و چۆنيه‌تيى ڕووبه‌ڕووبوونه‌وه‌ى هه‌ڕه‌شه‌كانى، ئه‌ركى هاوپه‌يمانيى نێوده‌وڵه‌تيى دژى داعش له عێراق و هه‌رێمى كوردستان، يارمه‌تى و هاوكاريى به‌ريتانيا و هاوپه‌يمانيى نێوده‌وڵه‌تى بۆ به‌هێزكردنى سيستمى به‌رگريى عێراق به هه‌رێمى كوردستانيشه‌وه، پته‌وكردنى هاوبه‌شى و هاريكاريى زياترى سه‌ربازيى به‌ريتانيا و هاوپه‌يمانيى نێوده‌وڵه‌تى له‌گه‌ڵ عێراق و هه‌رێمى كوردستان تاوتوێ كران.
سه‌رۆك نێچيرڤان بارزانى وێڕاى ده‌ربڕينى سوپاس و پێزانين بۆ ڕۆڵى به‌ريتانيا و هاوپه‌يمانيى نێوده‌وڵه‌تى له هاوكارى و پشتگيريكردنى عێراق و هه‌رێمى كوردستان بۆ تێكشاندنى داعش، جه‌ختى له پێويستى عێراق و هه‌رێمى كوردستان به به‌رده‌واميى ئه‌رك و پشتگيرى و هاوكاريى هاوپه‌يمانيى نێوده‌وڵه‌تى بۆ له‌ناوبردن و نه‌هێشتنى يه‌كجاره‌كيى داعش و مه‌ترسييه‌كانى كرده‌وه، هه‌روه‌ها سوپاسى هاوكاريى سه‌ربازيى به‌ريتانياى بۆ هه‌رێمى كوردستان له‌ڕووى مه‌شق و ڕاهێنانى پێشمه‌رگه و ڕۆڵ و به‌شدارى و پشتگيرى له چاكسازييه‌كانى وه‌زاره‌تى پێشمه‌رگه‌دا كرد.
له كۆبوونه‌وه‌كه‌دا كه به‌ڕێز كونسولى گشتيى به‌ريتانيا له هه‌ولێر ئاماده‌ى بوو، شاندى ميوان ستايش و پێزانينان بۆ ڕۆڵ و قوربانييه‌كانى پێشمه‌رگه له تێكشاندنى داعش ده‌ربڕى، هه‌روه‌ها گرنگيى بوونى ميكانيزمێكى تۆكمه‌ى هاريكارى و هه‌ماهه‌نگيى نێوان سوپاى عێراق و پێشمه‌رگه به پشتگيريى هێزه‌كانى هاوپه‌يمانان به‌تايبه‌تى له‌و ناوچانه‌ى بۆشاييى ئه‌منييان هه‌يه دووپات كرايه‌وه و باس له دۆخى ناوچه‌كه به‌گشتى و چه‌ند بابه‌تێكى جێى بايه‌خى هاوبه‌ش كرا.
