ئەنجوومەنی باڵای دادوەری عێراق رێژەی ئالودەبوون بە ماددەی هۆشبەر لەنێوان گەنجاندا گەیشتووەتە لەسەدا ٥٠
ئەنجوومەنی باڵای دادوەری عێراق ئاشکرای کرد کە رێژەی ئالودەبوونی گەنجان بە ماددەی هۆشبەر گەیشتووەتە لەسەدا ٥٠، ئەمەش دەگەڕێتەوە بۆ خراپی رەوشی ئابووری لە وڵاتەکەدا.
بە گوێرەی راگەیەنداوێکی ئەنجوومەنی باڵای دادوەری عێراق، دادوەری دادگای لێکۆڵینەوەی موسەیب لە بابل، نەبیل تائی رایگەیاندووە، رێژەی ئالودەبوون بە ماددەی هۆشبەر لەنێو گەنجاندا گەیشتووەتە لەسەدا ٥٠، بەڵام ئەم داتایە بە فەرمی یەکلایی نەکراوەتەوە”.
نەبیل تائی راشیگەیاندووە کە ئەو کەسانەی ماددەی هۆشبەر بەکاردەهێنن و بازرگانی پێودەکەن لە زۆربەی ناوچەکاندا هەن بەڵام بە زۆری و بەنزیکەی لەسەدا ٧٠ لە گەڕەکە هەژازنشینەکان و ئەو ناوچانەدان کە رێژەی بیکاری تیایاندا زۆرە لەگەڵ بوونی کێشەی کۆمەڵایەتی.
دادوەری دادگای لێکۆڵینەوەی موسەیب لە بابل ئاماژەی بەوە کردووە کە خراپی رەوشی ئابووری و زۆری رێژەی بێکاری هۆکارن بۆ بەکارهێنانی ماددەی هۆشبەر.
نەبیل تائی بە ئاماژەدان بەوەی کە ماددەی هۆشبەر لەنێو هەردوو رەگەزی نێر و مێدا بڵاوبووەتەوە گوتی: “تاوانەکانی ماددەی هۆشبەر تەنها لە پیاواندا نییە، بەڵکۆ ئەوە دەبینین کە ئافرەتانیش تێوەگلاون، گرنگترین هۆکار بۆ بڵاوبوونەوەی زیاتری ماددەی هۆشبەرەکان دەگەڕێتەوە بۆ زیادبوونی بەرهەمهێنانی ماددەی هۆشبەر لەسەر ئاستی جیهان، هەروەها مەترسیداریی تەکنۆلۆجیای گەیاندن و گواستنەوە کە رۆڵی کاریگەریان هەیە لە خێرا بڵاوبوونەوەیدا.
بەگوتەی ئەو دادوەرە، داوا یاساییەکانی ماددە هۆشبەرەکان لە دادگاکاندا زۆر زۆرە و داتاکانی بەرکارهێنانی ماددە هۆشبەرەکان بەردەوام روو لە هەڵکشانە.
لە میانی دەیەکانی رابردوودا عێراق وەک رێڕەوێک بۆ گواستنەوەی ماددەی هۆشبەر لە ئەفغانستان و ئێرانەوە بۆ ئەورووپا و وڵاتانی کەنداوی عەرەبی سەیردەکرا.
لە دوای رووخانی رژێمی پێشووی عێراق لە ساڵی ٢٠٠٣دا بەهۆی ناکۆکییەکان و ناسەقامگیری رەوشی ئەمنیی و ئابووری، لە ئێستادا عێراق بووەتە بەکاربەری سەرەکیی لە جۆرە جیاوازەکانی ماددە هۆشبەرەکان.
