پارتی لەبارەی حوکمدراوانی بادینان: باشترە لێگەڕێین دامەزراوە یاساییەكان كاری خۆیان بكەن و رێز لە رۆڵیان بگرین
مەکتەبی سیاسی پارتی ديموكراتى كوردستان راگەیێندراوێکی لەبارەی پێنج حوکمدراوه‌كه‌ى بادینان بڵاوکردەوە و ده‌لێ، “بەپێویستی دەزانین رێز لە دامودەزگەكانی دادوەری و سەروەری یاسا بگیرێت، دەستوەردان لە كاروباری دادگەكان و بەسیاسی كردنی بابەتەكان سوود بە بارودۆخەکە ناگەیەنێت ، ده‌شلێ : باشترە لێگەڕێین دامەزراوە یاساییەكان كاری خۆیان بكەن و رێز لە رۆڵیان بگرین”.
لە راگەیێندراوێکدا كه وێنه‌يه‌كى ده‌ست ده‌زگاى ميديايى ( خواكوڕك) كه‌وتووه ئەمڕۆ شەممە 08-05-2021 مەکتەبی سیاسی پارتی دیموکراتی کوردستان رایگەیاند، “چەند لایەنێك كاردانەوەی دوور لە رەچاوكردنی سەروەریی یاسا و رێساكانی دەسەڵاتی دادوەریان نیشان دا، بەپێویستی دەزانین رێز لە دامودەزگەكانی دادوەری و سەروەری یاسا بگیرێت، دەستوەردان لە كاروباری دادگەكان و بەسیاسی كردنی بابەتەكان سوود بە بارودۆخەکە ناگەیەنێت”.
مەکتەبی سیاسی پارتیدا لەبارەی هەڵوێستی بەشێک لە لایەنەکان و وەڵامی حیزبی پارتی بۆیان هاتووە له راگه‌يێندراوه‌كه ده‌شلێت، “ئەگەر هەوڵەكان بەو ئاڕاستەیە بن بابەتەكان بەسیاسی بكرێن و زیاتر وەكو بانگەشەی هەڵبژاردن و چەواشەكاری بخرێنە بەرچاوی هاوڵاتیان، ئێمەش لە پارتی دیموكراتی كوردستان زۆر بابەت هەیە باسیان بكەین”.
ده‌قى راگەیاندراوى مەكتەبی سیاسی پارتی دیموكراتی كوردستان :.
سەبارەت بە بڕیاری دادگای پێداچوونەوە لە بارەی كەیسی چەند كەسێك، بەداخەوە چەند لایەنێك كاردانەوەی دوور لە رەچاوكردنی سەروەری یاسا و رێساكانی دەسەڵاتی دادوەریان نیشان دا، بەپێویستی دەزانین رێز لە دام و دەزگاكانی دادوەری و سەروەری یاسا بگیرێت، دەستوەردان لە كاروباری دادگاكان و بەسیاسی كردنی بابەتەكان سوود بە بارودۆخەکە ناگەیەنێ و، مەرج نیە ئەگەر رەئی و لایەنگیری لایەنێك نەبوبێتە بڕیار مانای راست نەبوونی بڕیارەكان بێت.
ئەوەی رویداوە رونە، دوای لێكۆڵینەوەی یاسایی لەلایەن لایەنە یاسایی و پەیوەندارەكان بە پشت بەستن بەو بەڵگانەی بەردەستیان هەوڵی چەند كەسێكە بۆ تێكدانی سەقامگیری و، ئاسایشی هەرێمی کوردستان كراوەتە ئامانج. بۆیە باشترە لێگەڕێین دامەزراوە یاساییەكان كاری خۆیان بكەن و رێز لە رۆڵیان بگرین.
ئەگەر هەوڵەكان بەو ئاڕاستەیە بن بابەتەكان بەسیاسی بكرێن و زیاتر وەكو بانگەشەی هەڵبژاردن و چەواشەكاری بخرێنە بەرچاوی هاوڵاتیان، ئێمەش لە پارتی دیموكراتی كوردستان زۆر بابەت هەیە باسیان بكەین.
هیوادارین ئاڕاستە و لۆژیكی پاراستنی سەقامگیری و ئاسایشی هەرێمی کوردستان لە پێشەوەی هەموو هەوڵێكی دیكەوە بن.
مەكتەبی سیاسی پارتی دیموكراتی كوردستان
٨ـی ٥ـی ٢٠٢١
