رۆژنامه‌نووسێك: به‌به‌ڵگه یه‌كێتی زانیاری له باره‌ی سه‌كرده‌كانی په‌كه‌كه به توركیا داوه
دواى ئه‌وه‌ی له ماوه‌ی رابردوو یه‌كێتی سه‌رجه‌م بنكه‌و باره‌گاكانی پارته سیاسیه‌كانی نزیك له په‌كه‌كه‌ی له سنوری سلێمانی و هه‌ڵه‌بجه‌و گه‌رمیان و راپه‌رین داخست، له ئێستادا چالاكیه‌كانی په‌كه‌كه‌ی سنوردار كردووه‌و رۆژنامه‌نووسێكیش ده‌نووسێت له به‌رامبه‌ر رازی كردنی دڵی توركیا یه‌كێتی زانیاری له باره‌ی سه‌ركرده‌كانی په‌كه‌كه به توركیا ده‌دات.
ئاری حه‌سه‌ن رۆژنامه‌نووس و لێكۆله‌ری سیاسی له پێگه‌ی تایبه‌تی خۆی له تۆڕی كۆمه‌ڵایه‌تی فه‌یسبووك ده‌نووسێت یه‌كێتی نیشتمانی كوردستان له به‌رامبه‌ر كردنه‌وه‌ی فڕۆكه‌خانه‌ی سلێمانی به رووی گه‌شته ئاسمانیه‌كانی توركیا زانیاری له باره‌ی ژماره‌یه‌ك سه‌ركرده‌ی په‌كه‌كه به توركیا دا، كه دوا جار سه‌رجه‌میان له لایه‌ن توركیا كرانه ئامانج.
ئه‌و رۆژنامه‌نووسه ده‌شنوسێت، دوو به‌رپرسی باڵای په‌كه‌كه كه بۆ چاره‌سه‌ری له سلێمانی بوون، دوای ئه‌وه‌ی ویستبوویان له ئه‌زمه‌ڕ پشوویه‌ك وه‌ر بگرن، فڕۆكه‌كانی توركیا له ئه‌نقه‌ره‌وه هاتن له ئه‌زمه‌ر دوو سه‌ركرده‌كه‌ی په‌كه‌كه‌یان كوشت، ئه‌گه‌ر یه‌كێتی هه‌واڵی لێ نه‌دابن توركیا چۆنی زانی دوو كه‌سی مه‌ده‌نی له ئه‌مه‌زر كه سه‌رگه‌رمی نێرگه‌له كێشان بوون په‌كه‌كه‌ن.
هه‌روه‌ها ئه‌و رۆژنامه نووسه ده‌شنوسێت، دیار غه‌ریب سه‌ركرده‌ی دیاری په‌كه‌كه دوای كۆبوونه‌وه‌ی له‌گه‌ڵ چه‌ند فه‌رمانده‌یه‌كی سه‌ربازی یه‌كێتی كرایه ئامانج، له كاتێكدا دیار غه‌ریب خۆی و ته‌ها دوو كه‌سیی دیكه له‌گه‌ڵ یه‌كێتی كۆبوونه‌وه ئه‌گه‌ر یه‌كێتی هه‌واڵی لێ نه‌دابێت چۆن توركیا زانی كه ئه‌و ئۆتۆمبێله‌ی پێكای رێك هی سه‌ركرده‌كه‌ی په‌كه‌كه‌یه.
سه‌ركرده‌یه‌كی دیكه‌ی په‌كه‌كه له سنوری كونه ماسی كه چه‌ند خوله‌كێك پێشتر له‌گه‌ڵ یه‌كێتی كۆ بووه‌وه، ئه‌گه‌ر یه‌كێتی هه‌واڵی لێنه‌دابێت له نێوا ئه‌و هه‌موو خه‌لكه سڤیل و هاووڵاتیانی هاتوونه‌ته سه‌یران چۆن زاندرا كه ئه‌وه ئۆتۆمبێله‌كه‌ی فه‌رمانده‌كه‌ی په‌كه‌كه‌یه و بۆردوومانكرا هه‌موو ئه‌وانه پرسیارن كه یه‌كێتی خۆی له وه‌ڵامه‌كه‌ی ده‌دزێته‌وه‌و پێویسته وه‌ڵامیان بداته‌وه.
