مه‌حموود سه‌نگاوی میلانه دزراوه‌كه‌ی به په‌كه‌كه فرۆشتووه
دوای ئه‌وه‌ی كه فراكسیۆنی پارتی له په‌رله‌مانی كوردستان ئاشكرای كرد كه مه‌حمود سه‌نگاوی فه‌رمانده له یه‌كه‌ی 70ی پێشمه‌رگه‌ی یه‌كێتی، به‌شێك له‌و چه‌ك و ته‌قه‌مه‌نیانه‌ی كه له لایه‌ن وه‌زاره‌تی پێشمه‌رگه‌ی پێدراوه بۆ شه‌ڕی دژ به داعش له لایه‌ن سه‌نگاویه‌وه دزراون له نێویشدا سێ چه‌كی جۆری میلانی ئه‌ڵمانین كه چه‌كێكی كاریگه‌ره، ده‌زگای میدیای خواكوڕك ئاشكرای ده‌كات كه‌میلانه‌كان و چه‌كه‌كانی دیكه به په‌كه‌كه فرۆشراون.
سه‌رچاوه‌یه‌كی ئاگادار به ناوی هه‌ڤال زاگرۆس كه ئه‌و كات فه‌رمانده‌ی په‌كه‌كه بووه‌و له ئێستادا وازی هێناوه به ده‌زگای میدیای خواكوڕكی راگه‌یاند: پارتی كرێكارانی كوردستان و چه‌ند فه‌رمانده‌یه‌كی سه‌ربازی یه‌كێتی له سنوره‌كانی سلێمان و پشده‌ر هه‌ماهه‌نگی زۆر باشیان له نێوانیاندا هه‌یه، كه ته‌نانه‌ت هاوبه‌شیان له كاری بازرگانیدا هه‌یه.
ئه‌و فه‌رمانده‌یه‌ی پێشووی په‌كه‌كه ئاشكراشی ده‌كات، په‌كه‌كه له رێگای فه‌رمانده‌كانی یه‌كێتی كه بازرگانیان به‌یه‌كه‌وه ده‌كرد توانی چه‌ند جۆرێك چه‌كی نوێ و تازه‌ی به‌ده‌ست بگات، له وانه چه‌كی جۆری میلانی ئه‌ڵمانی كه چه‌كێكی تانكبڕه زۆر كاریگه‌ره.
هه‌روه‌ها فه‌رمانده‌كه‌ی پێشووی په‌كه‌كه ده‌شڵێت: مه‌حمود سه‌نگاوی فه‌رمانده‌ی سه‌ربازی پێشمه‌رگه له ناوچه‌ی سورێنی نزیك سلێمانی، سێ چه‌كی جۆری میلان و چه‌ندین گولـله‌ی ئه‌و جۆره چه‌كه و هه‌زاران پارچه چه‌كی تری به په‌كه‌كه فرۆشت، كه خۆم چالاكی وه‌رگرتنی چه‌كه‌كه به‌شدار بووم.
