د.باخان :ژیانی خۆمان له سلێمانى وه‌ك سیناریۆی فیلمه‌كانی تێكساس و چیرۆكی كێشه سنوورییه‌كانی نێوان ئه‌مه‌ریكا و مه‌كسیكۆ ده‌بينين
د.باخان ئازاد، له كۆنفرانسێكی رۆژنامه‌وانیدا ئاشكراى كرد كه، پێشتر به‌هۆی ئاشكراكردنی ژماره‌یه‌ك دۆسیه‌ی گه‌نده‌ڵی له كه‌رتی ته‌ندروستی پارێزگای سلێمانی و هه‌ڵه‌بجه هه‌ڕه‌شه‌ی كوشتنی لێكراوه و به‌و هۆیه‌وه ئه‌و شاره‌ی به‌ره‌و هه‌ولێر جێهێشتبوو و دواتر گه‌ڕاوه‌ته‌وه سلێمانی،
باخان ئازاد، ئه‌و پزيشكه‌ى ژماره‌يه‌ك دۆسيه‌ى گه‌نده‌ڵى له شارى هه‌ڵه‌بجه ئاشكرا كرد و دواتريش به‌هۆى هه‌ڕه‌شه‌ى كوشتن له‌سه‌رى رووى له شارى هه‌ولێر كرد ئه‌مرۆ له كۆنفراسێكى رۆژنامه‌وانيدا گوتی: “سلێمانی به شاری رۆشنبیری ناسراوه، رۆژانه ته‌قه‌ی تێدا ده‌كرێت و خه‌ڵك ده‌كوژرێت، له‌ولا كه‌سێك خنكا و له‌ملاش كه‌سێك سه‌ربڕا! ژیانی ئێمه له‌وشاره وه‌ك سیناریۆی فیلمه‌كانی تێكساس و چیرۆكی كێشه سنوورییه‌كانی نێوان ئه‌مه‌ریكا و مه‌كسیكۆ وایه‌و،مه‌ترسی له‌سه‌ر ژیانی رۆژنامه‌نووس هه‌یه، هه‌ر كاتێك راپۆرتێك بكات و له به‌رژه‌وه‌ندی خاوه‌ن هه‌ژموونه‌كاندا نه‌بێت، ده‌كوژرێت، بۆیه ده‌بێت هه‌موو رۆژنامه‌نووسان به ته‌واوی ره‌نگه جیاوازه‌كان بۆ له‌مه‌ودوا یه‌كده‌نگ بن بۆ ئاشكراكردنی گه‌نده‌ڵی و لابردنی په‌رده له‌سه‌ر ئه‌و هه‌موو كه‌سانه‌ی پێگه‌ی حزبی و حكومی خۆیان بۆ به‌رژه‌وه‌ندی تایبه‌ت له دژی خه‌ڵكی بێده‌سه‌ڵات به‌كارده‌هێنن.
ئه‌و پزیشكه گوتيشى،” چۆن ده‌بێت پزیشكێك كه سوێندی یاسایی خواردووه، فێڵ له نه‌خۆش بكات! یان درۆی له‌گه‌ڵدا بكات.
جه‌ختیشی كرده‌وه، پێویسته حكومه‌تی هه‌رێمی كوردستان و وه‌زاره‌تی ته‌ندروستی، كه‌رتی گشتی و كه‌رتی تایبه‌ت لێكجیابكه‌نه‌وه و رێگری له زیاتر دۆشین و داچۆڕینی گیرفانی نه‌خۆش بكه‌ن، له‌كاتێكدا نه‌خۆش خۆی پێویستی به هاوكارییه بۆيه ئێمه به هاوكاری هه‌موو ئه‌و كه‌سانه‌ی سه‌ر به حزبه جیاوازه‌كانن به‌بێ جیاوازی به‌رده‌وام ده‌بین و شانازییان پێوه ده‌كه‌ین.
دكتۆر باخان له وڵامى ئه‌وه‌ى هۆكاری جێهێشتنی سلێمانی به‌ره‌و هه‌ولێر،گوتى،” له‌به‌ر هه‌ڕه‌شه‌ی كوشتن رووم له شاری هه‌ولێر كردبوو كاتێك من چووم بۆ هه‌ولێر، هه‌موو داموده‌زگا فه‌رمییه‌كانم ئاگاداركرده‌وه، هه‌ر له ئۆفیسی نه‌ته‌وه یه‌كگرتووه‌كان، كونسوڵخانه‌ی وڵاتان، ده‌سته‌ی مافی مرۆڤ، وه‌زاره‌ته‌كانی داد و ته‌ندروستی، بگره تا ده‌گاته ئه‌نجومه‌نی دادوه‌ری و وه‌ك ئاماژه‌ی پێدا، ئێمه په‌یامی خۆمان گه‌یاند و شرۆڤه‌ی واقعه‌كه‌مان كرد، به‌وه‌ی كه ئه‌وان ئێمه‌یان تۆمه‌تبار كردووه و تۆمه‌تی بێبنه‌مایان خستووه‌ته پاڵمان.
سه‌باره‌ت به بوونى مه‌تريش له‌سه‌ر ژيانى دكتۆره باخانيش كه ئێستا گه‌ڕاوه‌ته‌وه سلێمانى گوتى : “حه‌ز ده‌كه‌م بكوژرێم، بۆ ئه‌وه‌ی ئه‌و كه‌سانه له‌سه‌ر ئاستی نێوده‌وڵه‌تی ریسوا ببن، ئه‌وه‌ش بزانرێت، كه كۆمه‌ڵه كه‌سانێك له‌ناو ئه‌و حزبانه كه هیچ خه‌باتێكیان نه‌كردووه و به “ماستاوچییه‌تی و كاسه‌لێسی” هاتوونه‌ته پێشه‌وه، ده‌بێت رووی راسته‌قینه‌ی هه‌موو ئه‌و كه‌سانه له‌لای حزبه‌كانیاشیان ئاشكرا بكرێت.
