پێداچوونه‌وه به بڕیاره‌كه‌ى دادگاى فیدڕڵى عێراق له‌باره‌ى دامەزراندنی دادگایەكی تایبەت بە تاوانەكانی داعش ده‌كرێت
دوای ئەوەی ھەرێمی كوردستان داوای دامەزراندنی دادگایەكی تایبەت بە تاوانەكانی داعشی كرد، لەلایەن دادگای فیدڕاڵییەوە ئەو داواكارییەی ھەرێمی كوردستان رەت كرایەوە، وەزیری دادیش دەڵێ، مەبەست لە دامەزراندنی دادگاكە، بۆ دادگاییكردنی ئەو كەسانە بووە كە تاوانی كوشتن و ئەشكەنجەدانی خەڵكیان ئەنجام داوە.
فرسەت ئەحمەد، وەزیری دادی حكوومەتی ھەرێمی كوردستان، بە ماڵپەڕی فەرمیی پارتی دیموكراتی كوردستانی راگەیاندووه، مەبەست لە پێشكەشكردنی داواكاری بۆ دامەزراندنی دادگایەكی تایبەت بە تاوانەكانی داعش، ئەوە بووە كە ئەو تۆمەتبارانەی دەستیان ھەبووە لە كوشتن و ئەشكەنجەدانی ھاووڵاتیان، دادگایی بكرێن، چونكە دادگاییكردنی تۆمەتباران، جێبەجێكردنی دادگەرییە بۆ گەیاندنی تۆمەتباران بە سزای خۆیان.
وەزیری داد گوتووشيه‌تى، دوو ساڵە ھەرێمی كوردستان چەندین بەڵگەنامەی لەسەر تاوانەكانی تیرۆریستانی داعش ئامادە كردووە و كاری لەسەر كراوە.
لەبارەی وەڵامی دادگای باڵای فیدڕاڵی، فرسەت ئەحمەد روونی كردۆته‌وه: “بڕیاری دادگای فیدڕاڵی پێداچوونەوەی بۆ دەكەین و لەگەڵ لایەنە پەیوەندارەكان وەڵامی خۆمان دەبێت، راستە لە ڕووی یاساییەوە تانە لە بڕیارەكانی دادگای باڵای فیدڕاڵی نادرێت، بەڵام ھێشتا دەرفەتی قسەكردن ماوە تا ئێمەیش بۆچوونی خۆمان بڵێین، لەبەر ئەوەی لەوانەیە ئەو شتانەی ئەوان باسیان كردووە، ئێمە لەگەڵی نەبین”.
راشيگه‌ياندووه، دامەزراندنی دادگایەك بۆ تاوانەكانی داعش، دادگایەكی تایبەت نییە، بەڵكو دادگایەكی تایبەتمەندە و جیاوازی ھەیە لە نێوان ئەو دوو دادگایەدا، ئەو دادگایەی پێشنیاز كراوە تایبەت نییە وەك ئەو بەناو دادگایەی شۆڕشی سەردەمی رژێمی بەعس كە خەڵكی بە كوشت دەدا.
