كاتی گه‌یشتنی پاره‌كه‌ی به‌غدا بۆ هه‌رێم ئاشكرا كرا
جێگری سەرۆکی ئه‌نجومه‌نی نوێنه‌رانی عیراق رایگەیاند، پێشبینیدەکات لە کۆتایی ئەم مانگەدا بەغدا پشکی بودجەی هەرێم بنێرێت.
بەشیر حەداد، جێگری سەرۆکی ئه‌نجومه‌نی نوێنه‌رانی عیراق لە کۆنفرانسێکی رۆژنامەنووسیدا رایگەیاند، ئێمە لە پەرلەمان کارمان کرد بۆ جێگیرکردنی پشکی هەرێم لە بودجەی فیدڕاڵی، لە ئێستادا حکومەت چوارچێوەیەکی یاسایی هەیە کە بتوانێت پشکی هەرێم بنێرێت.
ئاماژەی بەوەشدا، لەبەرامبەردا هەرێم پێویستە پابەندبێت بە ناردنی 250 هەزار بەرمیل نەوت بەشێوەی رۆژانە و رادەستکردنی 50% داهاتی نانەوتی هەرێم بە حکومەتی فیدڕاڵی.
بەشیر حەداد باسی لەوەشکرد، لە ئێستادا زیاتر لە لیژنەیەک لە هەرێم سەرقاڵی تەواوکردنی رێوشوێنە یاساییەکانن بەمەبەستی جێبەجێکردنی رێککەوتنی بودجە و ناردنی پشکی هەرێم و رادەستکردنی نەوت و داهاتەکان بە حکومەتی فیدڕاڵی.
گوتیشی: حکومەتی فیدڕاڵی بڕیاریداوە 200 ملیار دینار وەک سلفە رەوانەی هەرێم بکات تا گرتنەبەری رێوشوێنەکانی ناردنی پشکی هەرێم تەواودەبێت.
ئەوەش لەکاتێکدایە، ماوەی زیاتر لە دوو مانگە بودجەی 2021ی عیراق پەسەندکراوە، بەڵام تا ئێستا هیچ بڕە پارەیەک لە بەغداوە نەهاتووە بۆ هەرێم.
