بڵند ئیسماعیل: دەنگی پارتی لە ھەولێر زیاد دەکات
دوای ئەنجامدانی تیروپشک بۆ کاندیدەکان بانگەشەی ھەڵبژاردن لە عێراق دەستی پێ کردووە و بەرپرسێکی پارتییش لە سنووری پارێزگای ھەولێر دەڵێت، دەنگی زیاتر بەدەست دێنین و دوای جەژن بە گوڕ و تینێکی زیاترەوە دەست بە بانگەشە دەکەین.
بڵند ئیسماعیل، بەرپرسی لقی ١٦ی پارتی لە ھەولێر، بە ماڵپەڕی فەرمی پارتی دیموکراتی کوردستانی ڕاگەیاندوە: دوای دیاریکردنی وادەی بانگەشەی ھەڵبژاردن بۆ پرۆسەی ھەڵبژاردنی پێشوەختە، ئێمە وەکوو سەرکردایەتیی پارێزگای ھەولێری پارتی کۆ بووینەتەوە و بەپێی ئەو ڕێنمایییانەی مەکتەبی سیاسی بۆ ئێمەی دیاری کردووە دەستمان بە پرۆسەی بانگەشەی ھەڵبژاردن کردووە، ھەر لقێکی پارتی لە سنووری خۆی بانگەشەی دەست پێ کردووە و کاندیدەکانمان بەسەر بازنەکاندا دابەش کردووە.’
لەبارەی خاویی پرۆسەی بانگەشەی ھەڵبژاردن لەلایەن پارتییەوە بەرپرسەکەی پارتی دەڵێت: “ئێمە زیاتر لەسەر خۆ بانگەشە دەکەین، چونکە سێ مانگ زۆرە بۆ بانگەشەی ھەڵبژاردن و لە دوای جەژنی قوربان زیاتر دەچینە نێو جەماوەر و ھەڵمەتی بانگەشە زیادتر دەکەین.
پەیوەست بە دەنگی پارتی لە ھەولێر، بڵند ئیسماعیل ئاماژەی بۆ ئەوە کرد: پارتی دیموکراتی کوردستان جەماوەری خۆی ھەیە و پێگەی پارتی لە ھەولێر دیارە، بەپێی پێشبینیی ئێمە دەنگی پارتی لە ھەڵبژاردنی سنووری ھەولێر زیاد دەکات، چونکە لە ڕێگەی سیستەمی داتابەیس و ئۆرگانەکانی حزبەوە بەدواداچوونمان بۆ دەنگدەر و قەبارەی ڕێکخستنەکانمان کردووە.’
