سەرۆك بارزانی پێشوازی لە شاندی ئەنجوومەنی لاوانی كوردستان كرد و پاڵپشتیی خۆشی بۆ كارەكانیان ڕاگەیاند
![](https://xwakurk.com/wp-content/uploads/2021/07/سهرۆك-بارزانى-لهگهڵ-ئهنجوومهنى-لاوانى-كوردستان-كۆبوويهوه.jpg)
ڕۆژی سێشەممە 27ـی تەمووزی 2021 لە سەلاحەددین سەرۆك مەسعود بارزانی پێشوازی لە شاندی ئەنجوومەنی لاوانی كوردستان كرد كە لە سەرۆكی ئەنجوومەن و نوێنەری یازدە ڕێكخراوی جەماوەریی لاوانی لایەنەكان و پێكهاتەكان و هەروەها نوێنەرانی ڕێكخراوە ناحكوومییەكانی بواری كاروباری لاوان پێكهاتبوو.
لە دیدارەكەدا شاندی میوان كورتەیەكیان لەبارەی كار و چالاكییەكانیان و هەروەها پلان و بەرنامەی ئەنجوومەنی لاوانی كوردستان لەمەڕ پرسی بێكاریی لاوان و مەترسیی ماددە هۆشبەرەكان و هەروەها بەهێزكردنی ئینتیمای نەتەوەیی و ڕێكخستنەوەی كاروباری لاوان ئەویش لە نێو چوارچێوەیەكی هاوبەش بۆ سەرۆك بارزانی خستەڕوو و داواشیان كرد سەرۆك بارزانی پشتیوانی هەوڵ و چالاكییەكانیان بێت.
هەر لەو كۆبوونەوەیەدا سەرۆك بارزانی كاری هاوبەشی ڕێكخراوەكانی لاوانی بە هەنگاوێكی زۆر باش وەسف كرد و دەستخۆشیی لێ كردن و پاڵپشتیی خۆشی بۆ كارەكانیان ڕاگەیاند. لە درێژەی ئەو دانیشتنەدا سەرۆك بارزانی لەبارەی پرسە سیاسیەكان و تەحەددیاتی بەردەم لاوان و ئاسۆكانی داهاتوو ئامۆژگاری و ڕوونكردنەوەی پێویستی بۆ شاندی ئەنجوومەنی لاوانی كوردستان خستەڕوو.
![](https://xwakurk.com/wp-content/uploads/2021/07/224280427_892211208039811_8718285955465632186_n-1024x682.jpg)
![](https://xwakurk.com/wp-content/uploads/2021/07/224040200_892211174706481_3307932053974750890_n-1024x416.jpg)