هەولێر.. پرۆژەی ئاوی ئیفراز3 بەگەڕ خرایەوە و گرفتی كەمئاویی چارەسەر دەبێت
پرۆژەی ئاوی ئیفراز3 لە شاری هەولێر بەگەڕ خرایەوە و پرۆسەی بەرهەمهێنان و دابەشكردنی ئاو ئاسایی دەبێتەوە و لە ماوەی چەند كاتژمێری داهاتووشدا هەردوو پرۆژەكانی ئیفراز 1 و 2 دەست بە بەرهەمهێنانەوەی ئاوی خاوێن دەكەنەوە.
ئەندازیار ئاری ئەحمەد، بەڕێوەبەری گشتیی ئاو و ئاوەڕۆ لە وەزارەتی شارەوانی و گەشتوگوزار رایگەیاند، دوای چەند ڕۆژێك لە راگیرانی پرۆژەكانی ئاو لە شاری هەولێر كە بەهۆی بەرزبوونەوەی ڕێژەی شێلووبوونی ئاوی زێی گەورە راگیرابوون، ئێستا پرۆژەی ئیفراز 3 لە شاری هەولێر بەگەڕ خرایەوە و هەر ئەمڕۆش پرۆسەی بەرهەمێنان و دابەشكردنی ئاوی خاوێن بۆ ئەو گەڕەكانەی دەكەونە سنووری ئیفراز3 ئاسایی دەبێتەوە، كە بە تەنیا ئەو پرۆژەیە سەدا هەشتای گرفتەكە چارەسەر دەكات.
سەبارەت بە كارکردنی هەردوو پرۆژەكانی ئیفراز یەك و ئیفراز دوو، بەڕێوەبەری گشتیی ئاو و ئاوەڕۆ گوتی: لە ماوەی چەند كاتژمێری داهاتوودا ئەو دوو پرۆژەیەش بەگەڕ دەخرێنەوە و گرفتی كەمئاویی لە شاری هەولێر چارەسەر دەبێت كە چەند رۆژێكە بەهۆی شێلووبوونی ئاوی زێی گەورەوە ئەو پرۆژانە راگیرابوون.
