شنگال: هەركەسێ واز لە ریزەكانی پەكەكە بهێنێت، دەكوژرێ یان شوێنبزر دەكرێ
![](https://xwakurk.com/wp-content/uploads/2021/08/پهكهكه-شنگال.jpg)
پارتی كرێكارانی كوردستان (پەكەكە) بە شێوەیەكی توند بەرامبەر بەو كەسانە دەجووڵێتەوە كە ڕیزەكانی جێ دەهێڵن، بەرپرسێكیش ئاشكرای دەكات كە پەكەكە ئەو كەسانە لە شنگال شوێنبزر دەكات.
بەپێی نووسین و لێدوانی هەموو ئەو كەسانەی پێشتر لەنێو پەكەكەدا بوون و دواتر وازیان لە ریزەكانی ئەو حزبە هێناوە، پەكەكە یەكێكە لەو حزبانەی كە تەنیا لە قۆناغی خەڵەتاندندا بەرامبەر بە ئەندام و كادیرانی خۆیدا نەرمی دەنوێنێت، بەڵام دوای خەڵەتاندنی ئەو كەسانە، سەرجەم ئازادییەكانیان لێ زەوت دەكات و نایەڵێت بڕیاری چوونەدەرەوە لە ڕیزەكانی ئەو حزبە دەربكەن، بۆیە هەركەس ئەوەی كردبێت، ئەگەر نەكوژرابێت و گۆڕ ون نەكرابێ، ئەوە بەدڵنیاییەوە یان هەوڵی كوشتنی دراوە و سەری نەگرتووە، یان بەردەوام لەژێر مەترسییدا ژیاوە.
لەمبارەیەوە هادی سفوکا، بەرپرسی نووسینگەی کۆمەڵایەتیی لقی ١٧ی پارتی دیموکراتی کوردستان لە شنگال، ڕاگەیاند: “هەر کەسێک لە سنووری شنگال چووەتە ناو پەکەکەوە، لە لایەن ئەو ڕیکخراوەوە هەڵخەڵەتێندراوە، بۆیە ناتوانێ دەست لە پەکەکە بەر بدات، چونکە پەکەکە ڕێگەیان پێ نادات ڕیزەکانیان بەجێ بهێڵن و ئەگەر پەکەکە ڕێگەی بە خەڵکی بدایە کە ئازاد بن، ئێستا هەر شنگالیەك كە لەگەڵیانە وازی لەو ڕێکخراوە دەهێنا، بەڵام خەڵک چاوترسێن دەکرێن و هەڕەشەیان لێ دەکرێت کە هەر کەسێک واز لە پەکەکە بهێنێت، دەڕفێندرێن، یان دەکوژرێن”.
ئەو بەرپرسەی پارتی ئاشکراشی کرد: “لە هەفتەی رابردوودا هەندێک گەنجی شنگال کە لەناو بنکەیەکی تەندروستی لە لایەن فڕۆکەكانی تورکیاوە بوونە قوربانی، کەسوکاری قوربانییەکان ڕێگەیان بە پەکەکە نەدا ئاڵای خۆیان لەسەر تەرمی قوربانییەکان دابنێن و تەنانەت ڕێگەیان بە پەکەکەش نەدا ئەو قوربانییانە لەناو گۆڕستانی تایبەت بە پەكەكە بنێژن، چونکە خەڵکی شنگال لە ڕەفتار و هەڵسوکەوتەکانی پەکەکە زۆر بێزار بوون”.
هادی سفوکا بۆ باسنيوز ئاماژەی بەوەش کردووه: “ئەو کەسانەی لەلایەن پەکەکە هەڵدەخەڵتێنرێن، ناتوانن پەیوەندی بە دایک و باوک و کەسوکاری خۆشیانەوە بکەن و ناوی نهێنییان بۆ دیاری دەکەن، ئێستا زۆر کەسی پەکەکە کە لەناو شنگال نیشتەجێ بوون، بە ڕەچەڵەک شنگالی نین، بەڵکوو خەڵکی تورکیا و سووریان و پەکەکە بە زۆر بۆ ئەم سنوورەی هێناون”.
ئاماژەی بەوەش کردووه: “هەر کەسێک واز لە ڕیزەکانی پەکەکە بهێنێت، یان دەکوژرێت، یان دەڕفێندرێت و بێسەروشوێن دەکرێت، لە دوای جینۆسایدی شنگال لە ڕێکەوتی ٣ی٨ی٢٠١٤وە تا ئێستا ٣٠ هەتا ٤٠ هاووڵاتیی کوردی ئێزدیی خەڵکی شنگال لەلایەن پەکەکەوە بێسەروشوێن کراون و کەس لە چارەنووسیان ئاگادار نییە، بەهۆی ئەم دۆخەوە ئەو خێزانە ئاوارانەی شنگالیش کە گەڕاونەتەوە شوێنی ژیانی خۆیان، هەموو پەشیمانن و بەشێکیان گەڕاونەتەوە شارەکانی هەرێمی کوردستان، چونکە خەڵک بە دوای ئاسایشدا دەگەڕێت و ناتوانن لە شنگالدا بژین”.
خەڵكی دەرگاكانیان لە ترسی پەكەكە دادەخەن
بەرپرسی نووسینگەی کۆمەڵایەتیی لقی ١٧ی پارتی ئەوەشی ئاشکرا کرد: “ئێستا لەناو شنگال هەرکە ئێوارە دادێت، خەڵکی دەچنەوە ماڵ و لە ترسی پەکەکە دەرگا دادەخەن و لە ماڵ دەرناکەون، لە هەندێ شوێن خەڵک بە چەکەوە پاسەوانی لە ماڵ و خێزانی خۆیان دەکەن، چونکە خەڵک لە ڕفاندن و هەڵخڵەتاندنی منداڵەکانی خۆیان دەترسن، هەر کەسێک فریوی پەکەکە بخوات و بچێتە ڕیزەکانیانەوە، ئیتر دایک و باوک و کەسوکاری هیچ لەبارەی چارەنووسییەوە نازانن”.
لە نێو خەڵكی شنگالدا پرسیاری ئەوە دەكرێ ئاخۆ ئەو كەسانەی لە ڕووداوی بۆردومانكردنی نەخۆشخانەكەی سنووری شنگال بریندار بوون، چیان بەسەر هاتووە و بۆچی پەكەكە زانیارییان لەبارەوە نادركێنێت.
هادی سفوکا ئاشكرای كردووه: “دوای ئەوەی چەند ڕۆژ لەمەوبەر بنکەی تەندروستیی (سکینێی) لەلایەن تورکیاوە بۆردومان کرا، چەندین کەس لەناویدا بریندار بوون، بەڵام پەکەکە بریندارەکانی بۆ شوێنێکی نادیار گواستووەتەوە و تەنانەت کەسوکارەکانیشیان هیچ لەبارەی ڕەوشی تەندروستییان نازانن”.