سەرکردەیەکی پێشووی گۆڕان: سەرۆکی فەڕەنسا سەردانی سەرۆک بارزانی دەکات وەکوو ڕەمزێکی کوردستانی
![](https://xwakurk.com/wp-content/uploads/2021/08/سهرۆك-بارزانى-و-ماكرۆن.jpg)
ئەندامێكیی پێشووی جڤاتی نیشتمانیی بزووتنەوەی گۆڕان، رايدهيگهينێت، سەردانەکەی سەرۆکی فەڕەنسا بۆ ھەرێمی کوردستان، وەکوو وڵاتێکی زلھێزی ئەندامی ڕێکخراوی ناتۆ، ئەوە دووپات دەکاتەوە کە گەلی فەڕەنسا ھەمیشە دۆستی گەلی کورد دەبێت و لە بەگژاچوونەوەی ڕێکخراوە تیرۆریستییەکاندا هاوكاری هەرێمی كوردستان دەبێت.
دکتۆر سابیر ئیسماعیل گوتیشی: “کاتیک سەرۆکێکی گەورەی ئەورووپایی سەردانی ھەرێمی کوردستان دەکات، بەڵگەی ئەوەیە کە ھەرێمی کوردستان لە عێراق و ناوچەکەدا بۆ ئەورووپا و فەڕەنسا پێگەیەکی زۆر گرنگی ھەیە و ئەو وڵاتانە دەیانەوێت لە ڕێگەی کۆمپانیا بازرگانییەکانی خۆیانەوە بایەخ بە ئابووریی ھەرێمی کوردستان بدەن”.
ئەوەیشی خستە ڕوو: ”سەردانەکەی ماکرۆن بۆ ھەرێمی کوردستان لەم کاتەدا زۆر گرنگە، چونکە ئێستا ناوماڵی شێعە بەرەو لاوازی و لێکترازان دەڕوات و ئەم سەردانە پەیامێکیشە بۆ وڵاتانی دیکە، چونکە بە ھەموو پێوەرێکی مێژوویی و نێودەوڵەتی، فەڕەنسا لەو وڵاتانەی دیکە گەورەترە و بیگومان ماکرۆن بەو سەردانەی دووپاتی دەکاتەوە کە وەکوو سەرۆکی وڵاتێکی گەورە سەردانی کوردستانی کردووە و پەیامێکیشی داوە بە هەموان کە وا نەزانن کوردستانی فەرامۆش کردووە. بۆیە دەبوو یەکێک لە سەرکردەکانی ھەرێمی کوردستان بەشداریی ئەم کۆنگرەیەی بکردایە، چونکە ھەرێمی کوردستان ناوچەیەکی گرنگە و رۆڵی ھەیە”.
ئەو ئەندامەی پێشووی جڤاتی نیشتمانیی بزووتنەوەی گۆڕان كه بۆ باسنيوز قسهى كردووه ئاماژەی بەوەش کردووه: ”سەرۆکی فەڕەنسا وەکوو ڕەمزێکی کورد و كوردستانی لەگەڵ سەرۆک بارزانی کۆ دەبێتەوە، چۆنکە ئەمڕۆ سەرۆک بارزانی وەک شۆڕشگێڕێک و وەک سەرکردەیەکی بەئەزموونی کورد بەتەنیا لەناو گۆڕەپانەکەدا ماوەتەوە، ئەگەر بەرپرسانی باڵای ئەمریکا و ژاپۆن و ھەر وڵاتێک سەردانی کوردستان بکەن، لەگەڵ سەرۆک بارزانی کۆ دەبنەوە. بۆیە سەرۆکی فەڕەنساش سەردانی سەرۆک بارزانی دەکات و دەیەوێت لە ڕێگەی سەرۆک بارزانییەوە خوێندنەوەیەکی باش بۆ باوردۆخی سیاسیی کوردستان بکات“.