میرانی: ریفراندۆم بووە وەکالەتێکی هەتاهەتایی بۆ سه‌ربه‌خۆيی گەلی کوردستان

سكرتێری مه‌كته‌بی سیاسی پارتی دیموكراتی كوردستان رایده‌گه‌ێنێت: پارتی ریفراندۆمی بۆ سەربەخۆیی کرد و ئەو ریفراندۆمەش بووە وەکالەتێکی هەتاهەتایی گەلی کوردستان بۆ سه‌ربه‌خۆيی بوونی.

پێش نیوه‌ڕۆی ئه‌مڕۆ چوارشه‌ممه‌ 15 ى 9 ى 2021 ، فازڵ میرانی سكرتێری مه‌كته‌بی سیاسی پارتی دیموكراتی كوردستان له‌كۆبوونه‌وه‌یه‌كی له‌گه‌ڵ سكرتێر و به‌رپرسانی یه‌كێتی لاوان   له‌باره‌ی ره‌وشی ئێستای ناوخۆی هه‌رێمی كوردستان و هه‌ڵبژاردنی داهاتووی په‌رله‌مانی عێراق و ناوچه‌كه‌ قسه‌ی كرد .
سكرتێری مه‌كته‌بی سیاسی له‌باره‌ی به‌رێوه‌چوونى  ریفراندۆمی سه‌ربه‌خۆيی كه‌ پارتی دیموكراتی كوردستان ئه‌نجامیدا رایگه‌یاند: به‌رێوه‌چوونى ئه‌و ریفراندۆمه‌ بووه‌ وه‌كاله‌تێكی هه‌تا هه‌تایی گه‌لی كوردستان بۆ سه‌ربه‌خۆيی بوونی .

فازڵ میرانی راشیگه‌یاند: به‌رپرسانی عێراق و وڵاتانی ده‌ره‌وه‌، بیانه‌وێت یاخود نه‌یانه‌وێت، ناوچه‌كه‌ ئارام نابێت ئه‌گه‌ر كێشه‌ی كورد چاره‌سه‌ر نه‌كرێت.
سكرتێری مه‌كته‌بی سیاسی هه‌ر له‌و كۆبوونه‌وه‌یه‌دا به‌ به‌رپرسانی  یه‌كێتی لاوانی راگه‌یاند: عێراق خۆی كێشه‌ی هه‌یه‌  له‌ داهاتدا ،  له‌گه‌ڵ كوردا كێشه‌ی هه‌یه‌  و كێشه‌كانیش به‌چاره‌سه‌ر نه‌كراوی ماونه‌ته‌وه‌ ، عێراق كێشه‌ی له‌گه‌ڵ پێكهاته‌ و مافی مرۆڤ و ئازادی تاك و گشتی و یه‌كسانی هه‌یه‌ .

فازڵ میرانی ئاماژه‌ی بۆ ئه‌وه‌شكرد: پێویسته‌ به‌رێوه‌به‌رانی عێراق ، مامه‌ڵه‌ و بیركردنه‌وه‌یان به‌رامبه‌ر به‌ گه‌لی كوردستان بگۆڕن ، راشیگه‌یاند: كورد كێشه‌ی له‌گه‌ڵ كه‌سه‌كان نیه‌ ، کێشەی لەگەڵ بیرکردنەوەی دژە کوردانەی دەسەڵاتدارانی عێراق هەیە،چونكه‌ تا ئێستاكه‌ش ده‌سه‌ڵاتدارانی عێراق خۆیان وانیشان ده‌ده‌ن كه‌ نیشیمان په‌روه‌ر و دیموكراس خواز و ئازادی ده‌به‌خشن به‌ به‌رامبه‌ر كه‌چی وابیر ده‌كه‌ن به‌س خۆیان هه‌بن و یه‌ك حزبی هه‌بێت له‌ عێراقدا هاوشێوه‌ی رژێمی پێشووی عێراق.