مەسرور بارزانی : حکوومەتی هەرێمی کوردستان کاردەکات بۆ بەرەوپێشبردنی کۆمەڵگە بۆ ئاستێکی جیهانی
سەرۆکی هەرێمی کوردستان و سەرۆکی حکوومەتی هەرێمی کوردستان بەشداربوون لە کۆنفڕانسی پەروەردەیی لە زانکۆی ئەمریکی کوردستان لە دهۆک، سەرۆکی حکوومەت جەختی لە گرنگی و پەروەردە و خوێندن لە کابینەی حکوومەتەکەی کردەوە.
ئەمڕۆیەکشەممە، 19ـی ئەلوولی 2021، بە ئامادەبوونی سەرۆکی هەرێمی کوردستان و سەرۆکی حکوومەتی هەرێمی کوردستان کۆنفڕانسی پەروەردە لە زانکۆی ئەمریکی کوردستان لە دهۆک بەڕێوەدەچێت، لە کۆنفڕانسەکەدا مەسرور بارزانی، سەرۆکی حکوومەتی هەرێمی کوردستان گوتارێکی پێشکەش کرد و باسی لە گرینگی پەروەردە کرد و کارنامەی حکوومەتی هەرێمی خستەڕوو بۆ پێشخستنی پەروەردە.
مەسڕور بارزانی لەسەرەتای گوتارەکەیدا خۆشحاڵی خۆی دەربڕی بە ئامادەبوونی لە کۆنفڕانسەکەدا جەختی لە گرنگی پەروەردە کردەوە بۆ بەرەوپێشبردنی کۆڵگە و گوتی پەروەردە بنەمای کۆمەڵگەیەکی تەندروستە.
مەسرور بارزانی ڕایگەیاند، حکوومەتی هەرێمی کوردستان کاردەکات بۆ بەرەوپێشبردنی پەروەردە و خوێندنی باڵا بۆ ئاستێکی جیهانیی و پلانمان هەیە کە خوێندن بەرەوپێشببەین بۆ ئاستێک کە گونجاو بێت لەگەڵ پێشکەوتنەکانی سەدەی 21.
مەسڕور بارزانی ئاماژەی بەوە کرد، پێویستە ئامانج لە خوێندن فێربوون و زیادبوونی ڕۆشنبیری بێت نەک هەر وەرگرتنی بڕوانامە، بۆ ئەو مەبەستەش حکوومەتی هەرێم لە هەوڵدایە سیستەمی خوێندنی پەروەردە و خوێندنی باڵا وا ڕێکبخرێت کە گونجاو بێت لەگەڵ بازاڕ، بۆ کەمکردنەوەی ڕێژەی بێکاری و گەشەپێدانی بازاڕەکان.
مەسرور بارزانی ڕاشیدەگەیەنێت، حکوومەتی هەرێم بەنیازی پێکهێنانی دەستەیەکن، بۆ متمانەبەخشین و هەڵسەنگاندنی ئاستی دامودەزگاکانی خوێندن بەپێی ستاندارتە نێودەوڵەتییەکان، بە ئامنجی پێشخستنی پەروەردە دانانی پلانی تایبەت بۆ بەرەوپێشبردنی بواری پەروەردە و فێرکردن.
هەروەها ئاماژەی بەوەشكرد، حکوومەتی هەرێم دەستیکردووە بە چاکسازی لە هەموو بوارەکاندا، جەختی لەوە کردەوە کە بەردەوام دەبین لە چاکسازی، چونکە چاکسازی داهاتوویێکی گەشمان پێ دەبەخشێت.
ڕاشیگەیاند، کە هەوڵدراوە خۆشەویستی کوردستان و نیشتیمان لە دڵی گەنجان دەربهێندرێت، بەڵام پێویستە لە ڕێگەی پەروەردەوە مامۆستاکان ئەو خۆشەویستییە لە دڵی ڕۆڵەکانمان بچێننەوە
