حکومەت نزیكی 616 ملیۆن دیناری بۆ پرۆژەیەكی تۆڕی ئاوەڕۆ لە سلێمانی خەرج دەكات
فه‌رمانگه‌ی میدیا و زانیاری حكومه‌تی هه‌رێمی كوردستان له ڕاگه‌ێندراوێكدا ڕایگه‌یاند:بە مەبەستی پەرەپێدانی پرۆژە خزمەتگوزارییەكانی شاری سلێمانی، وەزارەتی شارەوانی و گەشتوگوزار بڕیاری دا بە خەرجكردنی گوژمەی زیاتر لە 615 ملیۆن دینار بۆ جێبەجێكردنی پرۆژەیەكی تۆڕی ئاوەڕۆی لوولەیی لە شاری سلێمانی.
فه‌رمانگه‌ی میدیا و زانیاری حكومه‌تی هه‌رێمی کوردستان ڕاشیگه‌یاند : كۆی گوژمەكە بریتییە لە (615,547,000) شەش سەد و پازدە ملیۆن و پێنج سەد و چل و حەوت هەزار دینار، لەسەر ڕێژەی %15ی داهاتی شارەوانی، بە مەبەستی جێبەجێكردنی پرۆژەی دروستكردنی تۆڕی ئاوەڕۆی لوولەیی بۆ كۆڵانەكانی جیاكراوەی 14 و 38 و 48 و لوبە، لە سنووری سەرۆكایەتیی شارەوانیی سلێمانی خەرج كرا.
خەرجکردنی ئەو بڕە پارەیە لەكاتێكدایە حکومەتی هەرێم زیاتر لە 381 ملیۆن دیناری دیكەشی بۆ دروستكردنی سێ پرۆژەی ئاوەڕۆی لوولەیی بۆ گەڕەكەكانی چوارچرا و ئاییندە و شادی لە ڕانیە خەرج كرد.
