پارتی لە سلێمانی: پێشبینی دەکەین لە هەر پێنج بازنەکەدا بەربژێرەکانمان سەرکەوتوو بن
بەرپرسی دەزگای هەڵبژاردنی پارتی لە سلێمانی و هەڵەبجە رایدەگەیێنێت، پێشبینی دەکەن لە هەر پێنج بازنەکەی پارێزگای سلێمانیدا بەربژێرەکانیان سەرکەوتوو بن.
رزگار ئەژی گۆران، بەرپرسی دەزگای هەڵبژاردنی پارتی لە سلێمانی و هەڵەبجە بە رادیۆی رووداوی راگەیاندووه: “دڵنیاین کە ئەم هەڵبژاردنەیش وەکو تاکە حیزب زۆربەی کورسییەکان بۆ پارتی دەبن. پێشبینی دەکەم ژمارەی کورسییەکانمان لەمەی ئێستا زیاتر ببێت. لە پارێزگای سلێمانییش پێشبینی دەکەین لە هەر پێنج بازنەکەدا بەربژێرەکانمان سەرکەوتوو بن.”
ئەو بەرپرسەی دەزگای هەڵبژاردنی پارتی گوتووشيه‌تى: “ئێمە زۆر جار لە سلێمانی لەلایەن دەزگا ئەمنییەکانەوە رێگریمان لێ دەکرێت کە راپرسی بکەین. ئەوە وایکردووە کە نەتوانین لە کاتی پێویستدا راپرسییەکانمان بکەین، بەڵام لەگەڵ ئەوەیشدا هەر کردووەمانە. ئەو چەند راپرسییەی ئێستا لە بەردەستی مندایە کە هیچیان هی ناوخۆی پارتی نییە، بەڵکو لایەنی بێلایەن و خەڵکی دەرەوە کردوویانن، زۆربەی زۆریان ئاماژە بەوە دەکەن کە لەم هەڵبژاردنەدا پارتی سەردەکەوێت.”
رزگار ئەژی گۆران لەبارەی ساختەکارییەوە لە هەڵبژاردندا باسی لەوە کرد کە ساڵی 2018 ساختەکاری ئەوەندە بەهێز بوو کە ئەوان و لایەنە ناڕازییەکانی دیکەی لێک نزیک کردەوە بۆ ئەوەی گفتوگۆیەکی راستەوخۆیان لەگەڵ یەکدیدا هەبێت تا بتوانن بەر بەو ساختەکارییە بگرن. ئەو کاتە سەعید کاکەیی کە سەر بە گۆڕان بوو، لە بەغدا کۆمیسیار بوو، لە راپۆرتێکدا دەڵێت: “رێژەی ساختەکاری لە سلێمانیدا 93٪ بوو.”
رزگار ئەژی گۆران ئەوەی خستەڕوو کە ئەوان ساڵی 2014 بۆ پەرلەمانی عێراق 93 هەزار دەنگیان هێناوە، لە 2018دا کە پێشبینییان دەکرد سێ-چوار کورسی ببەنەوە، یان بە لایەنی کەمەوە دوو پیاو و ئافرەتێکیان دەربچێت، یەک هەڤاڵیان دەرچوو و سەریان سووڕماو بوو کە 48 هەزار دەنگیان هێناوە.
