پلاسخارت: ئاگادارم… ئیدانەی رێگریکردن لە کاندیدانی پارتی لە شنگال دەکه‌م
نوێنەری تایبەتی سکرتێری گشتی نەتەوە یەکگرتووەکان له عێراق، ئیدانەی رێگریکردن لە کاندیدانی پارتی لە شنگال دەکات لەلایەن پەکەکەوە و رایدەگەیەنێت “هەموو کاندیدەکان ئازادن لە هاتووچۆ و بانگەشە کردن”.
رۆژی شەممە 2ی ئۆكتۆبەری 2021 لە سنووری شنگال ژمارەیەک چەكداری پەکەکە رێگرییان لە كاندیدانی پارتی دیموكراتی كوردستان كرد، كە بە نیازبوون بۆ بانگەشەی هەڵبژاردنی ئەنجومەنی نوێنەرانی عێراق سەردانی دەڤەرەكە بكەن، له‌و باره‌يه‌وه، جێنین ھێنیس پلاسخارت، نوێنەری تایبەتی سکرتێری گشتی نەتەوە یەکگرتووەکان له عێراق لە کۆنفرانسێکی رۆژنامەوامیدا لە بەغدا گوتی: “ئاگاداری ئەو رووداوەی شنگالم، هەموو حزبێک ئازادە لە بانگەشەی هەڵبژاردن، دەبێ دەسەڵات لە هەولێر و بەغدا کار بۆ هێورکردنەوەی رەوشەکە بکەن. دەزانم بانگەشەکردن ئاسان نییە لە عێراق، بەڵام دووپات دەکەمەوە هەموو کاندیدێک ئازادە چۆن و لە کوێ بانگەشە دەکات، دەبێ بە ئازادانە هاتووچۆ بکات. من ئیدانەی ئەو کارە دەکەم”.
پلاسخارت، سەبارەت بە هەوڵەکان بۆ ساختەکاری لە هەڵبژاردنی داهاتووی عێراق ئاماژەی بەوەدا: “ئێمە هەموو ئامانج و ئەرکمان ئەوەیە رێگری بکەین لە ساختەکارییەکان، بەتایبەتی لە کەرکووک، چاودێرەکانی نەتەوە یەکگرتووەکان هەموو هەوڵەکانیان دەخەنەگەڕ بۆ سەرخستنی ئەو پڕۆسەی دەنگدان، هەروەها چاودێری هەموو لایەنەکان دەکەین و بۆ ئەوەی بە دووربن لە هەڕەشە لە کاندیدەکان و دەنگدەران کە بە ناچاری دەنگیان پێبدەن”.
