حكومه‌ت پلانى ستراتیژیى نیشتمانى ڕووبەڕووبوونەوەى گەندەڵى پەسەند کرد … ده‌ستپاكى هه‌رێميش سكاڵاكان يه‌كلايى ده‌كاته‌وه
ئەنجوومەنى وەزیرانى هەرێمى کوردستان پلانى ستراتیژیى نیشتمانى ڕووبەڕووبوونەوەى گەندەڵى پەسەند کرد و سه‌رۆكى ده‌سته‌ى ده‌ستپاكى هه‌رێمى كوردستانيش ده‌لێ:” حکوومەتى هەرێمى کوردستان کار بە یاساى چاکسازى دەکات بۆ ئەنجامدانى پاکسازى لەو دۆسیە و بڕیارانەى دراون، ئێمەش لە دەستەى دەستپاکیی هەرێمى کوردستان کار دەکەین بۆ ئەوەى بتوانین ئەو سکاڵایانەى هەن، یەکلاییان بکەینەوە. .
د. ئەحمەد ئەنوەر، ئه‌مرۆ چوارشه‌ممه، 6-10-2021 له كۆنگره‌يه‌كى رۆژنامه‌ڤانيدا له‌باره‌ى پلانى ستراتیژیى نیشتمانى ڕووبەڕووبوونەوەى گەندەڵى رایگەیاند :” ئەو ستراتیژییە لەسەر بنەماکانى سوات ـ خاڵە بەهێز و لاوازەکان و هەڕشەکان داڕێژراوە و دواى پەسەندکردنى لەلایەن ئەنجوومەنى وەزیرانى هەرێمى کوردستانەوە لەسەر هەموو لایەنەکانى هەڵسەنگاندن بۆ تەواوى دامەزراوەکانى حکومەتى هەرێمى کوردستان و لە سێکتەرى دووەم تەواوى پارتە سیاسییەکان و لە سێکتەرى سێیەمدا کەرتى تایبەت هەڵسەنگاندنى بۆ دەکرێت و هەموو گفتوگۆکانیش بە شێوەى ڕوو بە ڕوو ئەنجام دەدرێن تاوەکو بتوانرێ ئەو خاڵە بەهێز و لاوازانە دەستنیشان بکرێن کە دەبنە هۆیەکانى سەرهەڵدانى گەندەڵى.
سەرۆکى دەستەى دەستپاکى هەرێمى کوردستان، گوتیشی: حکوومەتى هەرێمى کوردستان کار بە یاساى چاکسازى دەکات بۆ ئەنجامدانى پاکسازى لەو دۆسیە و بڕیارانەى دراون، ئێمەش لە دەستەى دەستپاکیی هەرێمى کوردستان کار دەکەین بۆ ئەوەى بتوانین ئەو سکاڵایانەى هەن، یەکلاییان بکەینەوە.
