مەسرور بارزانی له گه‌رمیان: خۆڕاگری خه‌ڵكی گه‌رمیان وایكردووه هه‌موومان پێتان سه‌ربه‌رز بین و خۆمان به قه‌رزاری ئێوه بزانین.
لەمیانی رێوڕەسمی کردنەوەی سایلۆی کەلار، مەسرور بارزانی، سەرۆکی حکومەتی هەرێمی کوردستان گوتارێکی پێشكه‌ش كرد و تێیدا رایگه‌یاند، گه‌رمیان بێ ناز بووه و بۆ من پرسیاره بۆچی تا ئێستا خزمه‌تگوزارییه بنه‌ڕه‌تییه‌كان پێشكه‌ش به خه‌ڵكی گه‌رمیان نه‌كراون و ئه‌مڕۆ زۆرترین داواكاری كه كراوه بابه‌تی خزمه‌تگوزاری بنه‌ڕه‌تی بووه.
سه‌رۆكى حكومه‌ت هه‌روه‌ها گوتی: له‌سه‌ر ئه‌وه سوورین ده‌سه‌ڵاتی یاسایی حكومه‌ت به‌سه‌ر هه‌موو ناوچه‌كاندا بسه‌پێنین.
سه‌رۆكی حكومه‌ت دووپاتیشیكرده‌وه، ناكرێت هیچ به‌شێك له كوردستان بمێنێت له ده‌ره‌وه‌ی ده‌سه‌ڵاتی ئیراده‌ی حكومه‌تی هه‌رێم كار بكات.
پوخته‌ی وته‌كانی مه‌سرور بارزانی، سه‌رۆكی حكومه‌تی هه‌رێمی كوردستان:
– گه‌رمیان پشكی زێڕی به‌ركه‌وتووه له قوربانیدان و به‌رگریكردن له خاكی كوردستان و خاوه‌نی هه‌زاران شه‌هیده و رووبه‌ڕووی كۆمه‌ڵكوژی و ئه‌نفال بووه‌ته‌وه.
– ئه‌ركی هه‌موومانه خزمه‌تی هه‌موو خه‌ڵكی ناوچه‌كان بكه‌ین.
– ئه‌م پڕۆژه‌یه به‌شێكه له ستراتیژی حكومه‌ت بۆ درووستكردنی ژێرخانی ئابووری له كوردستاندا.
– ئه‌م پڕۆژه‌یه ئاسایشی خۆراكی هه‌رێم دابین ده‌كات و ده‌بێته ژێر خان بۆ پێشكه‌وتنی كه‌رته‌كانی دیكه‌ی ئابووری له كوردستاندا.
– ئه‌گه‌ر كشتوكاڵ پێشبكه‌وێت پیشه‌سازی و بازرگانیش ده‌بووژێته‌وه.
– ستراتیژی حكومه‌ت بنیاتنانی پڕۆژه‌ی گه‌وره و فره‌چه‌شن كردنی سه‌رچاوه‌ی داهاته.
– گه‌رمیان هه‌میشه پێشه‌نگ بووه له به‌رگریكردن له كوردستان.
– خۆڕاگری خه‌ڵكی گه‌رمیان وایكردووه هه‌موومان پێتان سه‌ربه‌رز بین و خۆمان به قه‌رزاری ئێوه بزانین.
– له سه‌رتاوه 126 ملیار دینارمان بۆ چه‌ندین پڕۆژه‌ی جۆراوجۆر و ستراتیژی له گه‌رمیان ته‌رخان كردووه.
– چه‌ندین پڕۆژه‌ی دیكه‌شمان هه‌یه ئه‌وانیش رێگه‌ی كه‌لار – كفری و كه‌لار – ده‌ربه‌ندیخانه و هیوادارم به زوویی ته‌واو بكرێن.
– 16 ملیار دیناری دیكه بۆ 19 پڕۆژه‌ی دیكه خه‌رج ده‌كه‌ین.
– ئێمه هه‌رچی بكه‌ین بۆ ئه‌م ده‌ڤه‌ره كه‌مه. چونكه گه‌رمیان به گشتیی دوای ئه‌و هه‌موو نه‌هامه‌تی و كاره‌ساته شایسته‌ی ئه‌وه‌یه زیاتر خزمه‌تیان بكه‌ین.
– گوێم له داواكاری ئیداره‌ی گه‌رمیان گرتووه و زۆر له كه‌موكورتییه‌كان خزمه‌تگوزاری زۆر بنه‌ڕه‌تین، ئه‌وه‌ی پرسیاره بۆچی تا ئێستا ئه‌و خزمه‌تگوزاریانه نه‌گه‌یه‌ندراونه‌ته خه‌ڵك.
– ئێمه هه‌موومان فه‌رمانبه‌رین، هیچ منه‌تێكی تێدا نییه ئه‌گه‌ر ئێمه به خه‌می خه‌ڵكی خۆمانه‌وه بێین و ئه‌ركه‌كانمان جێبه‌جێ بكه‌ین.
– هیوادارم هه‌موو ئه‌و به‌ڕێزانه‌ی له حكومه‌تدان له خزمه‌تی هاووڵاتیان بن و ئه‌ركه‌كانیان به جددی جێبه‌جێ بكه‌ن.
– هه‌ندێك له داواكارییه‌كان یاسایین، وه‌كو یه‌كلاكردنه‌وه‌ی بڕیار له‌سه‌ر هه‌ندێك له‌و ناوچانه‌ی له رووی ئیداره‌وه سه‌ر به گه‌رمیانن و وه‌ك یاسا سه‌ر به پارێزگاكانی دیكه‌ن، ئه‌مه‌ش ئه‌ركێكه ده‌كه‌وێته سه‌ر شانی ئێمه وه‌ك حكومه‌ت و ئه‌و نوێنه‌رانه‌ی ده‌چنه به‌غدا، به‌شێكی زۆری ئه‌و پرسانه په‌یوه‌ندییان به په‌یوه‌ندی حكومه‌تی هه‌رێم و فیدراڵه‌وه هه‌یه. ئه‌مه‌ش وا ده‌كات بیر له‌وه بكه‌ینه‌وه ئه‌و كه‌سانه هه‌ڵبژێرین كه به جددی له خه‌می ئازار و به‌دیهێنانی مافه‌كانی خه‌ڵكی ئه‌م ده‌ڤه‌ره بن.
– حكومه‌ت له هه‌موو ناوچه‌كانی كوردستان ئه‌ركی هه‌یه و سه‌رتاسه‌رییه. به‌رپرسیارێتی حكومه‌ته بتوانێت چۆنێتی رێكخستنی كاروباره‌كان بگرێته ده‌ست.
– له‌سه‌ر ئه‌وه سوورین ده‌سه‌ڵاتی یاسایی حكومه‌ت به‌سه‌ر هه‌موو ناوچه‌كاندا بسه‌پێنین. ئه‌مه سه‌روه‌ریكردنی یاسایه و خۆسه‌پاندن نییه.
– ناكرێت هیچ به‌شێك له كوردستان بمێنێت له ده‌ره‌وه‌ی ده‌سه‌ڵاتی ئیراده‌ی حكومه‌تی هه‌رێم كار بكات.
– هه‌موو هه‌وڵێك ده‌ده‌م بۆ ئه‌وه‌ی خاڵه سنوورییه‌كان به شێوه‌یه‌ك رێكبخرێن و حكومه‌ت بتوانێت كۆنترۆڵی ئه‌و سنوورانه بكات و داهاتیان بۆ خه‌ڵك بگه‌ڕێته‌وه.
– هه‌موو هه‌وڵێك ده‌ده‌ین بۆ ئه‌وه‌ی چیدیكه گه‌رمیان بێناز نه‌مێنێت، ئه‌و ماوه‌یه‌ی گه‌رمیان بێناز بووه، ئه‌ركی قورستر ده‌خاته ئه‌ستۆمان كه زیاتر خزمه‌تیان بكه‌ین.
– ئه‌وه‌ی له توانای حكومه‌تدا بێت به دڵنیاییه‌وه بۆتان جێبه‌جێ ده‌كه‌ین.
– به‌شێكی زۆری مافه‌كانی ئێوه له به‌غدا پێشێلكراون و پێویسته ئه‌و شه‌ڕه له‌گه‌ڵ به‌غدا بكه‌ین بۆ جێبه‌جێكردنی ده‌ستوور.
– من نه‌هاتووم بۆ بانگه‌شه‌ی هه‌ڵبژاردن و هاتووم خزمه‌تتان بكه‌م.
– پێویسته نوێنه‌رانی ئێمه له به‌غدا به‌رگریكاری سه‌رسه‌ختی مافه‌كانی خه‌ڵكی كوردستان بن
– پێویسته نوێنه‌ره‌كانمان به‌یه‌كه كار بكه‌ن و هه‌وڵ بۆ جێبه‌جێكردنی ده‌ستوور بده‌ن.
– ئه‌و نوێنه‌رانه‌ی ده‌چنه به‌غدا پێویسته جه‌خت له‌سه‌ر ئه‌وه بكه‌نه‌وه، ده‌ستوور جێبه‌جێ بكه‌ن و قه‌ره‌بووی ئه‌نفالكراوان بكرێته‌وه.
– داوا له هه‌مووان ده‌كه‌م، به قه‌ناعه‌تێكی ته‌واو ئه‌و نوێنه‌رانه هه‌ڵبژێرن، كه به‌ڵێنه‌كانیان بكه‌نه كردار و بتوانن خزمه‌ت بكه‌ن. ئه‌و نوێنه‌رانه هه‌ڵبژێرن كه خۆیان ده‌كه‌نه قوربانی بۆ به‌دیهێنانی به‌رژه‌وه‌ندی وڵات و خه‌ڵكی كوردستان.
– هێشتا قه‌یرانی ئابووریمان ماوه و بابه‌تی په‌تای كۆرۆنا به‌رده‌وامه و داواتان لێده‌كه‌م هاوكاری حكومه‌ت بن و حكومه‌ت جیاواز نییه له ئێوه و حكومه‌ت و هاووڵاتی به‌یه‌كه‌وه ده‌توانن وڵات به‌ره‌و قۆناغێكی گه‌شتر و سه‌قامگیرتر به‌رن.
دەقی گوتەکانی مەسرور بارزانی، سەرۆکی حکومەتی هەرێمی کوردستان
بەناوی خوای گەورە و میهرەبان
خوشک و برایانی بەڕێز، ئامادەبووانی هێژا، زۆر زۆر بەخێربێن، سوپاسی ئامادەبوونی هەمووتان دەکەم. زۆر خۆشحاڵم کە ئەمڕۆ لە خزمەتی ئێوەدام. لە دەڤەری گەرمیانی سەربەرز هاتووین بۆ کردنەوەی پرۆژەیەکی دیکەی ستراتیژیی حکومەتی هەرێمی کوردستان، ئەو گەرمیانەی کە پشکی زێڕی بەرکەوتووە لە قوربانیدان و بەرگریکردن لە خەڵکی کوردستان، ئەو گەرمیانەی کە خاوەن هەزاران شەهیدە و رووبەڕووی کارەساتی کۆمەڵکوژی و جینۆساید و ئەنفال بووەتەوە. بۆیە ئەرکی هەموومانە کە خزمەتی کەسوکاری بنەماڵەی شەهیدان و ئەنفالکراوان بکەین، خزمەتی حکومەتە بەبێ جیاوازی لە هەموو ناوچەکانی کوردستاندا خزمەتگوزاری بکات.
ئەمڕۆ ئێمە لێرەین بۆئەوەی ئەم پرۆژە ستراتیژییە بکەینەوە کە بەشێکە لە ستراتیژییەتی حکومەت بۆ دروستکردنی ژێرخانێکی ئابووریی بەهێز لە کوردستاندا. ئێمە گرنگییەکی زۆرمانداوە بە دروستکردنی سایلۆ و کۆگا بۆئەوەی بەرهەمی جووتیارانی ئێمە وەربگرنەوە و جووتیارانمان چیدیکە لە خەمی ئەوەدا نەبن بزانن بەرهەمەکانیان چییان لێدێت. ئەمە ئاسایشی خۆراکی هەرێمی کوردستان دابیندەکات و وادەکات ببێتە ژێرخانێک بۆئەوەی کەرتەکانی دیکەی ئابووری لە کوردستاندا پێشبکەون. هەروەک دەزانن کشتوکاڵ بنەمایەکی سەرەکییە بۆ پێشخستنی ئابووریی هەر وڵاتێک.
ئەگەر کشتوکاڵ پێشبکەوێت و بەرهەمەکان زیادببن، بێگومان پیشەسازی و بازرگانییش لە وڵاتدا دەبووژێتەوە، بۆیە ئێمە گرنگیمان بەم ستراتیژییە داوە، لە ستراتیژییەتی حکومەتیش ئەوە بووە کە ئێمە زیاتر بیر لە پرۆژە گەورەکان بکەینەوە تاوەکو لە داهاتوویەکی نزیکدا کوردستان بتوانێت لەسەر پێی خۆی بوەستێت و سەرچاوەکانی داهات لە کوردستان هەمەجۆر بکرێت.
ئێمە لە سەرەتای دەستبەکاربوونی ئەم کابینەیە گرنگییەکی زۆرمان داوە بەم دەڤەرە، بۆئەوەی بتوانین تاڕاددەیەکی کەمیش بێت لە خزمەتی ئێوەی خۆشەویستدا بتوانین قەرەبووی ئەو هەموو زەحمەت و قوربانیدانەی خەڵکی گەرمیانی خۆشەویست بدەینەوە، ئێمە دەزانین کە گەرمیان بە چی نەهامەت و زەحمەتێکدا تێپەڕیوە. گەرمیان هەمیشە پێشەنگ بووە لەوەی کە بەرگری لە خاکی کوردستان بکات. هەمیشەش لە ریزی پێشەوە بووە کە شاڵاوی هێرشکردنی سەر کوردستان هاتووەتە هەرێم، گەرمیان پێش هەموویان بەرکەوتووە، بەڵام خۆڕاگری و قارەمانێتیی خەڵکی ئەم دەڤەرە وایکردووە کە هەموومان پێتان سەربەرز بین و ئێستاش خۆمان بە قەرزدارتان بزانین.
ئێمە لە حکومەت بۆئەوەی بتوانین خزمەتێکی باشتری ئەم دەڤەرە بکەین، لە سەرەتاوە بە بڕی 126 ملیار دینار پارەمان تەرخانکردووە بۆ چەندین پرۆژەی جۆراوجۆر و ستراتیژی لەم دەڤەرە، یەکێک لەوانەش دروستکردنی ئەم سایلۆ و کۆگایەیە کە ئێستا دەیبینن و دوای ماوەیەکی دیکە ئیشەڵڵا بە فەرمی دەیکەینەوە بۆئەوەی بکەوێتە خزمەتی جووتیارانی هەرێمی کوردستان.
