سه‌رۆكى هه‌رێمى كوردستان، به بۆنه‌ی یادی مه‌ولوود و له‌دایكبوونی حه‌زره‌تی موحه‌ممه‌د، پێغه‌مبه‌ری ئیسلام (دروودی خوای له‌سه‌ر بێت)،په‌یامێكی راگه‌یاند
نێچيرڤان بارزانى، سه‌رۆكى هه‌رێمى كوردستان، به بۆنه‌ی یادی مه‌ولوود و له‌دایكبوونی حه‌زره‌تی موحه‌ممه‌د، پێغه‌مبه‌ری ئیسلام (دروودی خوای له‌سه‌ر بێت)،په‌یامێكی راگه‌یاند و تێیدا پیرۆزبایی ئاراسته‌ی موسڵمانانی كوردستان و جیهان كرد و له‌به‌شێكى په‌يامه‌كه‌هاتووه:” با له‌م ياده‌دا چاكه و مرۆڤايه‌تى و په‌يره‌وكردنى په‌يامى ئاشتيخوازانه و مرۆڤدۆستى و مرۆڤپه‌روه‌ريى حه‌زره‌تى پێغه‌مبه‌ر كۆمانبكاته‌وه و هه‌موومان له‌سه‌ر بنه‌ماى ڕێنمايى و ئامۆژگارى و به‌ها باڵاكانى، بۆ پێکه‌وه‌ژیان و لێبورده‌یی و بۆ ئێستا و داهاتوويه‌كى باشترى مرۆڤايه‌تى كار بكه‌ين.
ده‌قى په‌يامى سه‌رۆك نێچيرڤان بارزانى بۆ يادى مه‌ولوودى پێغه‌مبه‌ر (د.خ)
له يادى له‌دايكبوونى پێشه‌وا و پێغه‌مبه‌رى مه‌زنى ئيسلامدا حه‌زره‌تى موحه‌ممه‌د دروودى خواى له‌سه‌ر بێت، گه‌رمترين پيرۆزبايى له هه‌موو موسڵمانان له كوردستان، عيراق و ته‌واوى جيهان و مرۆڤايه‌تى ده‌كه‌م.
هيوادارم ئه‌م ياده پيرۆزه خێر و خۆشى و ئاسووده‌يى بۆ ته‌واوى مرۆڤايه‌تى له‌گه‌ڵ خۆيدا بهێنێت و ببێته هانده‌رێك بۆ هه‌مووان كه گيانى خۆشه‌ويستى و ئاشته‌وايى و ميهره‌بانى له‌ناو خۆمان و ده‌وروبه‌ر و هه‌مووماندا پته‌وتر بكات.
با له‌م ياده‌دا چاكه و مرۆڤايه‌تى و په‌يره‌وكردنى په‌يامى ئاشتيخوازانه و مرۆڤدۆستى و مرۆڤپه‌روه‌ريى حه‌زره‌تى پێغه‌مبه‌ر كۆمانبكاته‌وه و هه‌موومان له‌سه‌ر بنه‌ماى ڕێنمايى و ئامۆژگارى و به‌ها باڵاكانى، بۆ پێکه‌وه‌ژیان و لێبورده‌یی و بۆ ئێستا و داهاتوويه‌كى باشترى مرۆڤايه‌تى كار بكه‌ين.
ئه‌م ياده له هه‌موو لايه‌ك پيرۆز بێت و هه‌موو ساڵێك به خێر و خۆشى.
نێچيرڤان بارزانى
سه‌رۆكى هه‌رێمى كوردستان
2021/10/17
