ئیسرائیل مەشق و راهێنانەکانی بۆ جێبەجێکردنی گورزی سەربازیی لە دژی پێگە ناوکییەکانی ئێران دەست پێ کردەوە
بە گوێرەی راپۆرتەکانی کەناڵی “12”ی ئیسرائیلی و پێگەی “تایمز ئۆف ئیسرائیل”، دوای راوەستانی بۆ ماوەی دوو ساڵ جارێکی دیکە هێزی ئاسمانی ئیسرائیل مەشق و راهێنانەکانی دەست پێ کردەوە بۆ جێبەجێکردنی گورزی سەربازیی لە دژی پێگە ناوکییەکانی ئێران.
راپۆرتەکان روونیان کردەوە، ئەفیف کۆخافی، سوپاسالاری ئیسرائیل فەرمانی کرد بە پاڵپشتیکردنی ئەم هەنگاوە، ئەمەش دوای سەرنەکەوتنی ئەرکەکانی ئەمریکا دێت تا ئێستا بۆ گەڕانەوەی ئێران بۆ سەر مێزی گفتوگۆ لەپێناو رێککەوتنی ناوکی نوێ.
بەپێی راپۆرتەکان، ئیسرائیل و رەنگە ئەمریکایش ئەوە دەزانن کە دەبێت پلانێکی سەربازیی ئامادە بکرێت لە ئەگەری شکستهێنانی دیپلۆماسییەت لەگەڵ ئێران و، زەحمەتە بێ بژاردەی سەربازیی ئێران رازی بکەی لەسەر دانوستان.
هاوکات دوێنێ پێنجشەممە، ئەڤیگدۆر لیبەرمان، وەزیری دارایی ئیسرائیل رایگەیاند، رووبەڕووبوونەوە لەگەڵ ئێران لە ئانوساتدایە و ئەوەندەی نەماوە.
ئەمە لە کاتێکدایە حکوومەتی ئیسرائیل پێش چەند رۆژێک رەزامەندیی دا لەسەر بودجەیەک بە بەهای 1.5 میلیار دۆلار لەپێناو پتەوکردنی تواناکانی بۆ بەئامانجکردنی بەرنامەی ناوکی ئێران.
