ته‌ندروستی سلێمانی: لەبارەی داخستنی ناوه‌نده‌كانی خوێندن بریاری کۆتاییدا
ماوه‌ی چه‌ند ڕۆژێكه ده‌نگۆی داخستنی قوتابخانه له هه‌رێمی كوردستان بڵاو ده‌كرێته‌وه، به‌هۆی زۆربوونی حاڵه‌ته‌كانی تووشبووان و مردن به كۆڕۆنا و به‌تایبه‌تیش له سنووری پارێزگای سلێمانی و ده‌ڤه‌ری ڕاپه‌ڕین.
له‌مباره‌یه‌وه دكتۆر سه‌باح هه‌ورامی به‌ڕێوه‌به‌ری گشتی ته‌ندروستی سلێمانی ڕایگه‌یاند: ئه‌گه‌ری داخستنی ناوه‌نده‌كانی خوێندن به‌هۆی زۆربوونی په‌تای كۆڕۆنا، ئه‌گه‌رێكی زۆر لاوازه.
ڕاشیگه‌یاند: كوتانی ئیجباری تاكە چارەسەرە بۆ ئەوەی پڕۆسەی پەروەردە مساڵ تووشی گرفت نەبێت.
داواشی له پەروەردەی گشتیی سلێمانی و دامودەزگاكانی دیكەی حكوومەتی هەرێم كرد مامۆستایان و فەرمانبەرانی خۆیان ئیجبار بكەن تا خۆیان بكوتن كە ئەوە تاكە چارەسەرە.
دكتۆر سه‌باح هه‌ورامی به‌ڕێوه‌به‌ری گشتی ته‌ندروستی سلێمانی هه‌روه‌ها ڕایگه‌یاند: پێشتر ئەگەر هاووڵاتی خوازیاری وەرگرتنی ڤاكسینی هەبووایە دەبوو ماوەیەكی زۆر ناوی خۆی تۆمار بكات تا ناوەكەی دەهاتەوە و ئه‌مه‌ش چەند ڕۆژێكی زۆری پێ دەچوو، به‌ڵام ئێستا بەس تەنیا لەسەر بڕیاردانی هاووڵاتی وەستاوە، ئەگەر بڕیار بدات خۆی بكوتێت تەنیا یەك كاتژمێری پێویست دەبێت.
