به‌رپرسێكى گۆڕان بۆ شايان عه‌سكه‌رى: گۆڕان بە قیژەقیژت هەڵناستێتەوە
ئه‌ندامێکی جڤاتی گشتیی بزووتنەوەی گۆڕان، داوا لە پەرلەمانتارانی بزووتنەوەکەی دەکات، لە جێگەی قیژەقیژ، ”بچن لەسەر گۆڕەكەی نەوشیروان مستەفا تۆبە بکەن“. ئەوەشی نەشاردەوە كە ئەو شەرم دەكات ئەم جۆرە پەرلەمانتارانە نوێنەرایەتیی حزبەكەی دەكەن لە پەرلەماندا.
پاش ئەوەی شایان عەسكەری، ئەندامی فراكسیۆنی گۆڕان لە پەرلەمانی كوردستان، لە كۆبوونەوەی ڕۆژی ٢٦ی ١٠ی ٢٠٢١، بە قسەكانی بووە هۆی دروستكردنی گرژی لەنێو فراكسیۆنەكان بە تایبەتیش لە كاتێكدا بۆ موزایەدەی نێو تۆڕە كۆمەڵایەتییەكان، بە مۆبایلەكەی تۆماری ڤیدیۆیی قسەكانی كرد و بڵاوی كردەوە، لە هەموو ئاستەكاندا نیگەرانی بەرامبەر بەم هەڵسوكەوتەی دروست بوو.
لەمبارەیەوە که‌ریم فه‌خری، ئه‌ندامی جڤاتی گشتیی بزووتنەوەی گۆڕان، ڕايگەیاند، ”قیژه‌قیژی شایان عه‌سکه‌ری و گرووپه‌که‌ی، ده‌رخه‌ری شکستی قووڵە و له خۆشییه‌وه وا ناکه‌ن، بەڵکوو لەبەر ئەو شکستەیە كە گۆڕان تووشی بووە“.
ئەوەشی نەشاردەوە كە هەرچەندە خەڵك باش ده‌زانێت له په‌رله‌ماندا چی ده‌گوزه‌رێت، بەڵام ”ئەگەر ده‌یانه‌وێت بۆ په‌رله‌مانی کوردستان خۆیان كاندید بکەنەوە، قیژه‌قیژ و ئاژاوەنانەوە دادیان نادات، من ئه‌ندامی جڤاتی گشتیی گۆڕانم، شه‌رم ده‌که‌م ئه‌وانه نوێنه‌رایه‌تیی حزبه‌که‌م بکه‌ن”.
ئەو سەركردەیەی گۆڕان پێیوایە كە قیژەقیژی پەرلەمانتارەكانی، بوونەتە هۆكاری كشانەوەی خەڵك لە پەرلەمان.
كەریم فەخری كه بۆ باسنيوز قسه‌ى كردووه دەشڵێت: ”کاک نه‌وشیروان چوو، گۆڕانیش چوو، ئه‌مه بوو ڕێبازی کاک نه‌وشیروان؟ بینیتان گۆڕان چی لێ هات؟ گەیشتە سفر و ژێر سفر، وای لێ هاتووه گۆڕان به قه‌رز ده‌نگی بۆ یه‌کێتی کۆ ده‌کرده‌وه، گۆڕان ده‌یه‌وێت چۆن هه‌ستێته‌وه؟ ئاخۆ تۆ بەو دۆڕانە بەرچاوەوە و به پاشه‌کشه‌ی ته‌واوه، ده‌ته‌وێت ئاوا بە قیژەقیژ هه‌ستیته‌وه؟ بڕۆن له‌وه زیاتر له‌به‌رچاوی خه‌ڵک ناشرینمان مه‌که‌ن“.
لە كۆتاییشدا پرسیاری ئەوەی كرد، ”ئه‌گه‌ر شایان و پەرلەمانتارانی دیكە، گۆڕانیان خۆش ده‌وێت و جه‌ماوه‌ریان زۆره، بۆ ڕوویان نه‌هات بچن ده‌نگ بۆ گۆڕان کۆ بکه‌نه‌وه؟ گۆڕان به قیژه‌قیژ ناچێته‌وه سه‌ر شەقامی قیر“.
