برایەکی راکان جبووری بە نۆ مانگ زیندانیکردن حوکمی بۆ دەرچوو
![](https://xwakurk.com/wp-content/uploads/2021/01/65-1.jpg)
بەیانیی ئەمڕۆ دووشەممە لە دادگای لێکۆڵینەوەی کەرکووک برایەکی راکان جبووری بە نۆ مانگ زیندانیکردن حوکمی بۆ دەرچوو.
سەرچاوەیەکی ئاگادار لە دادگاییەکە رايگەیاند، “ئەمڕۆ لەسەر دۆسیەی گەندەڵی و پارە خواردن لە دیوانی پارێزگای کەرکووک، ستافێکی ئیدارەی پارێزگا لێکۆڵینەوەیان لەگەڵ کرا کە لەنێویاندا کوڕ و برایەکی راکان جبووری و بەرپرسی بەشی پلاندانانی ئیدارەی پارێزگا هەبوون”.
لە ئەنجامی لێکۆڵینەوەکە، وەکو ئەو سەرچاوە ئاگادارە ئاماژەی پێدا، “هەریەک لە عەلی سەعید جبووری، برای راکان جبووری پارێزگاری بەوەکالەت و قاسم ئیبراهیم، بەرپرسی بەشی پلاندانان لە ئیدارەی کەرکووک و ریاز ئەحمەد تاهیر و ئیبراهیم خەلیفە بەپێی ماددەی 331لە یاسای سزادانی عێراقی، هەریەکەیان بە نۆ مانگ زیندانیکردن حوکم دران و دەبێت نۆ مانگ لە زیندان بەسەرببەن”.
سەرچاوەکە ئەوەشی خستەڕوو، “کوڕەکەی راکان و چەند کەسێکی دیکە بەبێ سزا لە دادگاییەکە دەرچوون”.
لە ماوەی رابردوودا هەریەک لە راکان جبووری و براکەی و کوڕەکەی و بەشێک لە بەرپرسانی نێو دیوانی پارێزگا بانگهێشتی دادگا کران بۆ لێکۆڵینەوە، بەڵام لە تەواوی دادگاییەکان بەبێ سزا دەردەچوون.
![](https://xwakurk.com/wp-content/uploads/2021/11/viber_image_2021-11-22_13-15-58-413-708x1024.jpg)
س: رووداو