ناوه‌ڕۆكی كۆبوونه‌وه‌ی نێچیرڤان بارزانی و مه‌كگۆرگ ئاشكرا كرا
له میانه‌ی كۆبوونه‌وه‌یدا له‌گه‌ڵ نێچیرڤان بارزانی سه‌رۆكی هه‌رێمی كوردستان، برێت مه‌كگۆرگ ڕێكخه‌ری كاروباری ڕۆژهه‌ڵاتی ناوه‌ڕاست و باكوری ئه‌فریقا له كۆشكی سپی، دووپاتی كرده‌وه كه ئه‌مه‌ریكا له پشتگیریكردنی عێراق و هه‌رێمی كوردستان به‌رده‌وام ده‌بێت، بۆ ڕووبه‌ڕووبوونه‌وه و تێكشكاندنی یه‌كجاریی داعش، ده‌توانن پشتی پێ ببه‌ستن.
ئه‌مڕۆ دووشه‌ممە، له كۆبوونه‌وه‌كه‌دا نێچیرڤان بارزانی كاتی سه‌ردانی مه‌كگۆرگی بۆ عێراق و هه‌رێمی كوردستان به گرنگ له قه‌ڵه‌م دا، دووپاتی كرده‌وه كه له سه‌روبه‌ندی گۆڕانی ئه‌ركی هێزه‌كانی ئه‌مه‌ریكا و هاوپه‌یمانان له عێراق، دووپاتكردنه‌وه‌ی به‌رده‌وامیی پابه‌ندیی ئه‌مه‌ریكا به پشتگیریكردنی عێراق و هه‌رێمی كوردستانه‌وه، په‌یامێكی گرنگه.
له كۆبوونه‌وه‌كه‌دا هه‌ڵبژاردن و ئه‌نجامه‌كانی و پێشبینی بۆ داهاتووی پرۆسه‌ی سیاسی له عێراق، گفتوگۆی نێوان هێز و لایه‌نه عێراقییه‌كان، هه‌وڵه‌كان بۆ دامه‌زراندنی حكوومه‌تی نوێی فیدراڵ، دۆخی ته‌ناهی و سه‌ربازی و ئابووریی وڵات، هێرش و په‌لاماره‌كانی داعش، هاریكاری و هاوئاهه‌نگی نێوان پێشمه‌رگه و سوپا، پێوه‌ندییه‌كانی هه‌ولێر ـ به‌غدا، گفتوگۆی ستراتیجیی عێراق ـ ئه‌مه‌ریكا و ده‌رفه‌ته‌كانی بره‌ودان به پێوه‌ندییه‌كانی هه‌ردوولا، تاوتوێ كران.
هه‌ردوولا هاوڕابوون كه داعش مه‌ترسییه‌كی ڕاسته‌قینه‌یه و بۆ ڕووبه‌ڕووبوونه‌وه و تێكشكاندنی، هێشتا عێراق پێویستی به به‌رده‌وامیی پشتگیریی هاوپه‌یمانیی نێوده‌وڵه‌تی هه‌یه، هه‌روه‌ها هاریكاری و هاوئاهه‌نگیی هێز و لایه‌نه عێراقییه‌كانیان به پێویست زانی، بۆ ئه‌وه‌ی بتوانن حكوومه‌تێكی كۆكه‌ره‌وه له وڵات پێك بهێنن كه وه‌ڵامده‌ره‌وه‌ی داواكارییه‌كانی هاووڵاتییانی عێراق بێت و ئارامی و سه‌قامگیریی بپارێزێت.
