پارتی و یەکێتی: پشتیوانیی حکومەتی هەرێمی کوردستانین بۆ چارەسەری کێشەکان
كۆبوونه‌وه‌ی هه‌ردوو شاندی مه‌كته‌بی سیاسی پارتی ديموكراتى كوردستان و یه‌كێتی نيشتيمانى كوردستان به‌ڕێوه‌چوو و راگه‌یاندراوێكی هاوبه‌ش له‌سه‌ر كۆبوونه‌وه‌كه بڵاوكرایه‌وه.
دوای ئه‌وه‌ی پێش نیوه‌ڕۆی ئه‌مڕۆ یه‌كشه‌ممه 19 ى 12 ى 2021 ، له ده‌باشان كۆبوونه‌وه‌ی شاندی مه‌كته‌بی سیاسی پارتی و یه‌كێتی له‌سه‌ر ڕه‌وشی ناوخۆی هه‌رێمی كوردستان و عێراق و ناوچه‌كه به‌ڕێوه‌چوو ، له دوای كۆبوونه‌وه‌كه راگه‌یاندراوێكی هاوبه‌شی نێوان هه‌ردوولا بڵاوكرایه‌وه.
له راگه‌یاندراوه هاوبه‌شه‌كه‌ی مه‌كته‌بی سیاسی پارتی ديموكراتى كوردستان و یه‌كێتی نيشتيمانى كوردستاندا هاتووه: كۆبوونه‌وه‌ی هاوبه‌شى هه‌ردوو شاندی مه‌كته‌بی سیاسی پارتی دیموكراتی كوردستان و یه‌كێتی نیشتیمانی كوردستان به میوانداری بافڵ جه‌لال تاڵه‌بانی له ده‌باشان سازكرا.
له راگه‌یاندراوه‌كه هه‌روه‌ها هاتووه: له كۆبوونه‌وه‌كه‌دا كه‌ئه‌مڕۆ 19 ى 12 ى 2021 به‌ڕێوه‌چوو، گفتوگۆ له‌سه‌ر چه‌ند ته‌وه‌رێكی گرنگ كرا، تایبه‌ت دۆخی سیاسی عێراق دوای هه‌ڵبژاردنه‌كانی 10 ى ئۆكتۆبه‌ری ڕابردوو و ئیستحقاقه‌كانی كورد و یه‌كخستنی هه‌ڵوێستی كوردستانی له‌سه‌رجه‌م دۆسیه گرنگه نه‌ته‌وه‌یی و نیشتیمانییه‌كان له به‌غدا.
نوێده‌كرێته‌وه.
له كۆبوونه‌وه‌كه‌دا، باسی هه‌وڵدان بۆ گه‌ڵاڵه‌ی كۆتایی كارنامه‌ی هاوبه‌شی كوردستان له‌سه‌ر بنچینه‌ی شه‌راكه‌تی ڕاسته‌قینه و ته‌وافوق و ته‌وازونی ده‌ستووری، وه‌ك له عێراقی نوێدا له‌سه‌ری پێكهاتبووين، به‌شێكى تر بوو له ته‌وه‌رى كۆبوونه‌وه‌كه.
هه‌ردوولا كۆك بوون له‌سه‌ر ئه‌وه‌ی پشتیوانیی حكوومه‌تی هه‌رێمی كوردستان بكه‌ن بۆ چاره‌سه‌ری كێشه‌كان له هه‌موو روویه‌كه‌وه، به تایبه‌ت له رووی گوزه‌ران و مووچه و شایسته داراییه‌كانی سه‌رجه‌م چین و توێژه‌كانی خه‌ڵكی كوردستان به توێژی خوێندكاران و قوتابیانیشه‌وه.”
كۆبوونه‌وه‌كه هه‌ڵوه‌سته‌ی له‌سه‌ر مه‌ترسیی ئه‌منی و سه‌ربازی تێهه‌ڵچوونه‌وه‌ی ڕیكخراوی تیرۆریستیی داعش له كه‌ركووك و ناوچه دابڕێندراوه‌كان كرد، له‌م بواره‌دا به پێویست زانرا هه‌ماهه‌نگی و پێكه‌وه‌یی هه‌ردوو هه‌بێ وه‌ك به‌شێك له ڕووبه‌رووبوونه‌وه‌ی ئه‌و مه‌ترسییانه‌ی له‌سه‌ر خاك و خه‌ڵكی كوردستان له‌و ناوچانه هه‌یه، هه‌روه‌ك به‌شێك له پێویستیی دابینكردنی ژینگه‌یه‌كی باشی ته‌بایی و یه‌كڕیزیی نێوان هه‌ردوولا و هێزه سیاسییه‌كانی تر به‌ره‌و په‌ره‌پێدانی په‌یوه‌ندییه دووقۆڵییه‌كان بۆ خێروخۆشیی گه‌لی كوردستان، له‌م باره‌یه‌شه‌وه میكانیزمی پێویست بڕیاری لێوه درا.
