پارێزگارى هه‌ولێر: له ساڵی نوێدا به‌ڵێن ده‌ده‌ین به شه‌و و ڕۆژ نه‌وه‌ستین بۆ خزمه‌تكردنی هاووڵاتییانی شاری هه‌ولێر
له په‌یامێكدا پارێزگاری هه‌ولێر پیرۆزبایی ساڵی نوێی زایینی له خه‌ڵكی هه‌ولێری پایته‌خت و ته‌واوی خه‌ڵكی كوردستان كرد و به‌ڵێنیشی به هاووڵاتییانی شاری هه‌ولێر دا به شه‌و و ڕۆژ نه‌وه‌ستن بۆ خزمه‌تكردنیان به‌تایبه‌تیش له گه‌ڕه‌ك و شوێنه هه‌ژارنشینه‌كاندا.
ئه‌مرۆ هه‌ينى 31-12-2021، ئومێد خۆشناو پارێزگاری هه‌ولێر په‌يامێكى پيرۆزبايى بڵاو كرده‌وه و ڕایگه‌یاند: بە بۆنەی سەرى ساڵى نوێ، پیرۆزبایی لە خەڵكی هەولێری پایتەخت و تەواوى خەڵکی خۆشەویستی کوردستان و خانەوادەی سەربەرزی شەهیدان و پێشمەرگە قارەمانەكان دەكەم. هیوادارم ساڵی تازە ساڵى دەستپێكی قۆناغێكی نوێ و باشتربوونی ژیان و گوزەرانی هاووڵاتییان و بەدیهاتنی سەقامگیری و پێشكەوتنی زیاتر بێت.
پارێزگارى هه‌ولێر، ڕاشیگه‌یاند: بە پێویستی دەزانم، جارێکى تر سەرخۆشى خۆم ئاڕاستەى شەهیدانى هێرش و پەلامارە تیرۆرستییەکانى ئەم دواییەى داعش و قوربانییانى لافاوەکەى هەولێر بکەم، هەروەها سوپاسی پارێزگاکانى ترى هەرێم و ئیدارەى سەربەخۆکان و رێکخراوە خێرخوازى و کەسایەتییەکانى شار و شارۆچکەکانى کوردستان بکەم کە لە کاتى هەردوو ڕووداوى کارەساتبارى بەسەر شارەکەمانداهات بەهۆى لافاوەوە، لە بەهانەوەچوون و یارمەتیدانى لێقەومان لەگەڵ هەولێر بوون و درێغییان نەکرد، هەڵوێستیان پەیامێکى نیشتمانى گەورە و مایەى شانازییە و لەلاى ئێمە لەبیرنەکراوە.
ئومێد خۆشناو، هه‌روه‌ها ڕایگه‌یاند: ئەگەرچی ساڵی 2021، ساڵێکی پڕ زەحمەت و سەخت بوو لەلایەک بەهۆی تەشەنکردنى ڤایرۆسی نوێى کۆرۆنا و لەدەستدانی ئازیزان، لەلایەکى دیکەوە بەهۆى ئەو ڕووداوە کارەساتبارە سروشتییانەى بەسەر شارەکەماندا هات، بەڵام لەهەمانکاتدا ساڵێکى پڕ لە دەستکەوت بوو لە گەیاندنى خزمەتگوزارى و خزمەتکردنى هاوڵاتییان.
ئومێد خۆشناو دڵنیایی دایه هاوشارییان و هاوڵاتییانى سنوورى پارێزگای هه‌ولێر و ڕایگه‌یاند: هەروەک چۆن لە 2021 لەو ساڵە پڕ زەحمەت و قەیرانە دارییەدا توانیمان خزمەتیان بکەین و دەستی خزمەتگوزاریی لە چوارچێوەى پڕۆژەکانى پەرەپێدانى پارێزگاى هەولێر بگەێنین بە زۆر شوێن، بەهەمان شێوە هەموو هەوڵى خۆمان دەخەینەگەڕ بۆ ئەوەی لە ساڵی نوێدا بگرە زیاتر بەبێ جیاوازی و بەشێوەیەکى یەکسان لە سەنتەرى شار و هەموو گوند و ناحییە و قەزاکانى سنوورى پارێزگاکەمان بە تایبەتى لە گەڕەک و شوێنە هەژارنشینەکان و ئەو شوێنانەى کەمترین دەستى خزمەتگوزاریان پێگەیشتووە، خزمەتکاری هاووڵاتییانى خۆمان بین، دڵنیابن بەردوام دەبین و بەشەو و ڕۆژ ناوەستین، هەرچی لە تواناماندابێت و بۆمان بکرێت لە خزمەتکردن و دەستەبەرکردنی خزمەتگوزاری و پاراستنى ئارامى پایتەخت و سەروماڵی هاوولاتییان و هاوشاریانمان درێغى ناکەین.
له كۆتایى په‌يامه‌كه‌يدا پارێزگاری هه‌ولێر گوتی: “جارێکی دیکە ساڵی نوێتان پیرۆزبێت و بە ئومێدى ئەوەى ساڵی نوێ، ساڵی ئارامى و خۆشگوزه‌رانى و به‌خته‌وه‌رى بێت بۆ هه‌موو لایه‌ك و ساڵی خێر و بەرەکەت بێت، دووربن لە ناخۆشی و نەخۆشی”.
