فڕۆكە جەنگییەكانی ئیسرائیل هێرشی ئاسمانییان کردە سەر خاڵێکی سەربازی حەماس
بەرەبەیانی رۆژی یەکشەممە سوپای ئیسرائیل رایگەیاند چەند هێرشێکی ئاسمانیی کردووەتە سەر کەرتی غەززە، ئەوەش دوای رۆژێک لەوە دێت، کە لە ناوچەی ژێر دەسەڵاتی حەماس چەند مووشەکێک ئاراستەی خاکی ئیسرائیل کران.
لە گرتە ڤیدیۆیەکدا، کە لە خان یونس لە باشووری کەرتی غەززە تۆمارکراوە، دەردەکەوێت سێ تەقینەوەی گەورە روودەدەن و دەنگی فڕۆکەی شەڕکەریش دێت.
گەواهیدەران باسیان لەوە کرد کە فڕۆکە جەنگییەکان 10 جار لەسەر یەک هێرشی ئاسمانییان کردووەتە سەر ئەو ناوچەیە.
وەزارەتی تەندروستیی فەڵەستین، هێشتا روونکردنەوەی نەداوە لەوەی هێرشەکە قوربانی لێکەوتووەتەوە یان نا.
دوێنێ سوپای ئیسرائیل بڵاوی کردەوە کە دوو مووشەک لە کەرتی غەززەوە ئاراستەی وڵاتەکەی کراوە و لە کەناراوەکانی ناوچەی گوش دان کەوتوونەتە دەریای ناوەڕاستەوە.
