لەسەر فەرمانى مەسرور بارزانی، هەردوو ناحیەى عەنکاوە و پیرمام بەفەرمى بوون بە قەزا

به‌ فەرمانى مەسرور بارزانی، سەرۆکى حکومەتى هەرێمى کوردستان، هەردوو ناحییه‌ی عەنکاوە و پیرمام بە فەرمى بوون بە قەزا و قایمقامه‌كانیان ده‌ستبه‌كاربوون.

له‌ راگه‌يێندراوێكدا كه‌ ئه‌مرۆ سێشه‌ممه‌ 15-2-2022، پارێزگای هه‌ولێر بڵاويكرده‌وه‌، تێدا راى گه‌ياندووه‌: ئەمڕۆ  ئومێد خۆشناو، پارێزگارى هەولێر، فەرمانى کارگێرى و دەست بەکاربوونى وەک قایمقام بەوەکالەت لە قەزاکانى عەنکاوە و پیرمام رادەستى رامی نوری عۆدیش، وەک قایمقامى قەزایی عەنکاوە  و حامد ئیسماعیل حه‌مه‌دئەمین، وەک قایمقامى قەزایی پیرمام  کرد.

له‌ راگه‌يێندراوه‌كه‌ هه‌روه‌ها هاتووه‌ ، ئومێد خۆشناو بەناوى سەرۆکى حکومەتى هەرێمى کوردستان و وەزیرى ناوخۆ، پیرۆزبایی لە قایمقامی هەردوو قەزاکە کرد و هیواى سەرکەوتنى بۆ خواستن.

جێگەى باسە، دواى ئەوەى رۆژی دووشەممە 04-10-2021، ڕێزدار مەسرور بارزانی، سەرۆکى حکومەتى هەرێمی کوردستان، سەردانی ناحیەی عەنکاوەی کرد، وەزیری ناوخۆ و پارێزگاری هەولێر و ئەنجوومەنی پارێزگای هەولێر ڕاسپارد بۆ ئەوەی ناحیەی عەنکاوە بکرێت بە قەزا.

عەنکاوە کە ئێستا بۆتە قەزا، دەکەوێتە باکووری رۆژئاوای شارى هەولێر و زۆربەی دانیشتووانەکەى کلد و ئاشوورین و وابەستەی کڵێسای کلدانی کاسۆلیکین و ناوەندێکی گرنگە بۆ پێکەوەژیانی ئایینی و کۆمەڵایەتی و شوێنێک بۆ ئاشتەوایی، هەروەها بووەتە ناوەندێک بۆ خوشک و برا کریستیانانەکان کە لە شوێن و ناوچەکانی دیکەی عێراق نەیانتوانیوە بمێننەوە و روویان لە عەنکاوە کردووە و لەوێوە نیشتنەجێ بوونە.

قەزایی پیرمامیش کە بە (مەسیف سەڵاحەدیین) ناودەبرێت، یەکێک بوو لە ناحیەکانی سەربە قەزای شەقڵاوە لە پارێزگای ھەولێر و بەدووری 28 کیلۆمەتر دەکەوێتە باکووری خۆرئاوای شاری ھەولێر و یەکێک بوو لە گەورەترین ناحیەکانی قەزایی شەقڵاوە کە گوندەکانی سنووری ئەم ناحیەیە ژمارەیان 66 گوندە.