د.جووتیار عادل: لەگەڵ حکوومەتی عێراق بەردەوام دەبین لە گفتوگۆکردن
گوتەبێژی حکوومەتی ھەرێمی کوردستان، جووتیار عادل دەڵێت “بڕیارەکەی دادگای باڵای فیدڕاڵی بە بڕیارێکی سیاسیی دەیبینین، بێگومان ئەمە پەیوەستە بە چەند هۆکارێکی دیکە و چەند رەھەندێکی سیاسیی ھەیە، ئێمە لە حکوومەتی ھەرێم بە ئاشکرا ئەم بڕیارەمان رەتکردەوە و لەلای ئێمە قبوڵکراو نییە، چونکە پشت بە ھیچ بنەمایەکی دەستووری نابەستێت”.
د.جووتیار عادل، گوتەبێژی حکوومەتی هەرێمی کوردستان بە ئاژانسی (ئانادۆڵ)ی توركی راگەیاندووه: “هەرچەندە بڕیارەکانی دادگای فیدڕاڵی تانەی لێ نادرێت چونکە دەسەڵاتی باڵایە، بەڵام لەگەڵ حکوومەتی عێراق بەردەوام دەبین لە گفتوگۆکردن، ئێمەلە حکوومەتی هەرێم بە ئاشکرا ئەم بڕیارەمان رەتکردووەتەوە قبوڵکراو نییە، چونكە ئەم بڕیارە پشت بە هیچ بنەمایەکی دەستووری نابەستێت و دەسەڵاتەکانی دەستووریی هەرێم لەم بوارەدا رەچاونەکراوە”.
جووتیار عادل راشيگه‌ياندووه: “بڕیارەکەی دادگای فیدڕاڵی لە چەند رۆژی رابردوودا لەبارەی نەوت و غازی هەرێمی کوردستان، ئێمە بە بڕیارێکی سیاسیی دەیبینین، بەتایبەت لەم کاتەدا، چونکە ئەم دۆسیەیە لە ساڵی ٢٠١٢ەوە لە دادگایە، لەماوەی ١٠ ساڵدا ئەم دۆسیەیە خەوێنرابوو، بەڵام بۆچی لەم کاتەدا، بێگومان ئەمە پەیوەستە بە چەند هۆکارێکی دیکە و چەند رەهەندێکی سیاسیی هەیە،ئەم جۆرە بڕیارانە لە بەرژەوەندی ئایندەی سیاسیی عێراقیشدا نیە، چونکە بەبێ ئەوەی رەچاوی دەسەڵاتەکانی هەرێم و تایبەتمەندییەکانی بکرێت، بڕیارێک دەربچێت و سیاسەت دابڕێژرێت، پێشبینیی دەکەم ئەمە مەترسی لەسەر ئایندەی سیاسیی عێراق دروست بکات”.
گوتەبێژی حکوومەتی هەرێمی کوردستان دڵنیاییدا بە کۆمپانیاکانی بواری نەوت و پابەندبوونی حکوومەت بە ئەرکەکانی بەرامبەر بە کۆمپانیاکان و وڵاتانی هاوبەشیش دووپاتکردەوە و گوتی: “ئێمە پابەندین بەو ئەرکانەی لەبەرامبەر ئەو کۆمپانیا و وڵاتانەی کە هەمانە، ئەو پابەندبوونە بە نیسبەت حکوومەتەوە ئەولەویەتی هەیە و دڵنیایان دەکەین پابەندین لەسەر ئەرکەکانمان، هاوکات حکوومەتی هەرێمی کوردستان لەسەر ئەم بابەتە، چ لەسەر بنەمای دەستوور بێت کە ئێمە دڵنیاین لەو گرێبەستانە پشتمان بەدەستوور و یاسای نەوت و غازی هەرێم بەستووە، بۆیە ئێمە بە قەناعەتێکی تەواو ئەو سیاسەتەی کردوومانە سیاسەتێکی راست و دروست بوو”.
