حه‌سه‌ن عه‌له‌وى چه‌ند میدیایه‌كى عێراقی و كوردی بە ساخته‌كار ناو ده‌بات
له لێدوانێكدا بیرمه‌ند و سیاسه‌تمه‌دارى عێراقى حه‌سه‌ن عه‌له‌وى ئه‌مرۆ چوارشه‌ممه، ره‌تى ده‌كاته‌وه كه هیچ نامه‌یه‌كى بۆ سه‌رۆك بارزانى ناردبێت و بۆ ئه‌م مه‌به‌سته‌ش چه‌ند ده‌زگایه‌كى میدیاى ناوخۆییی كوردى و عه‌ره‌بى به‌درۆ ده‌خاته‌وه.
دواى ئه‌وه‌ى چه‌ند ده‌زگا و سایتێكى هه‌واڵى نزیك له به‌ره‌ى ئێرانه‌وه نامه‌یه‌كى ساخته‌یان به ناوى بیرمه‌ند و سیاسه‌تمه‌دار حه‌سه‌ن عه‌له‌وى بڵاوكردۆته‌وه گوايه خۆى نووسيوويه‌تى چه‌ند سایتێكى كوردیش به‌بێ پشتڕاستكردنه‌وه هه‌مان بابه‌تیان بڵاوكردۆته‌وه و كاريان له‌سه‌ر كردووه .
له‌م باره‌يه‌وه، حه‌سه‌ن عه‌له‌وى، له ڕوونكردنه‌وه‌یه‌كدا ئه‌مرۆ چوارشه‌ممه 16-3-2022 له‌باره‌ى ئه‌و هه‌واڵانه‌ى كه له ژماره‌يه‌ك ميديايى عێراقى و كوردى به مه‌به‌ست بڵاوده‌كرايه‌وه، گوتى ره‌تى ده‌كه‌مه‌وه كه هیچ نامه‌یه‌كم سه‌باره‌ت به مووشه‌كبارانى هه‌ولێر له‌لایه‌ن ئێرانه‌وه بۆ سه‌رۆك بارزانى ناردبێت.
له روونكردنه‌وه‌كه‌ى ئه‌و بيرمه‌نده سياسييه عێراقيه كه بۆ شه‌فه‌ق نيوز داويه‌تى هاتووه:” پێویسته لایه‌نه ته‌كنیكاره‌كانى سه‌ر به حكوومه‌ت ئه‌و لایه‌نانه ئاشكرا بكه‌ن كه به ناوى كه‌سایه‌تى و نووسه‌ر و سیاسه‌تمه‌داران بابه‌تى هه‌ڵبه‌ستراو بڵاو ده‌كه‌نه‌وه، ئه‌و بابه‌ته‌ش په‌یوه‌ندى به منه‌وه نییه، ناوى من ساخته‌كراوه بۆيه ئه‌و كه‌سانه‌ى ساخته‌كارى بڵاو ده‌كه‌نه و به زووترین كات ده‌دۆزرێنه‌وه.
