ته‌نيا كوردى: له‌پێناو پۆستى به‌غدا ھەندێ کەناڵ و میدیای یەکێتی، ڕاستەوخۆ دەیانەوێت فەوزایەکی سیاسی و ئاگرێکی تائیفی بەرۆکی کوردستان بگرێت
''نانەوەی فیتنەی ئایینی لە زیانی کوردستان و ئەو جوگرافیایەشە کە یەکێتی بەرپرسیارێتیی تێیدا ھەیە''
هەندێک میدیا و کەناڵی یەکێتیی نیشتمانیی کوردستان کار بۆ نانەوەی فەوزای سیاسی و تائیفی لە کوردستان دەکەن و، ڕولێكى خراپ له پێناو به‌رژه‌وه‌ندى دوژمنانى كوردستان ده‌گرن و شەڕی پۆستەکانی لە بەغدا پێ گەرم ده‌کات.
لەم بارەیەوە، تەنیا کوردی، لێکۆلەری پرسە ستراتیژییەکان ڕاگەیاند، لە ڕووی سایکۆلۆژییەوە بەشێک لە میدیای یەکێتی نەخۆش کەوتوون، ئەمەش دەرخەری ئەوەیە کە زاکیرەی میدیای یەکێتی پێویستی بە ئەبدەیتە بۆ دووبارە خۆڕێکخستنەوەیان لە بابەتی گەیاندندا.
ئەو لێکۆلەرەی پرسە ستراتیژییەکان گوتیشی: ”وەک لە ھەندێ کەناڵ و میدیای یەکێتی دەردەکەوێت، ڕاستەوخۆ دەیانەوێت فەوزایەکی سیاسی و ئاگرێکی تائیفی بەرۆکی کوردستان بگرێت و پێکەوەژیانی ئاشتیانەی ئایینی لە سەرتاسەری عێراق و ھەرێمی کوردستان بخزێننە نێو پۆست و پۆستکاریی بەغداوە کە ئەمەش خراپترین نوسخەی گەیاندنە کە یەکێتی لە میدیادا سپۆنسەریی دەکات”.
تەنیا کوردی ئاماژەی بەوە دا کە ”پێشتریش میدیای یەکێتی لە بابەت پێکھاتە ئایینییەکانی کوردستان ڕۆڵێکی خراپی گێڕاوە، ئەمڕۆش لە بابەت تویتی کەسێک بە ناوی د. نایف کوردستانی کە ناوەڕۆکی تویتەکە ھیچ پەیوەندیی بە پارتییەوە نییە، دەیەوێت وێنەیەکی جیاوازی پێ بدات و لە چوارچێوەی بەرژەوەندییەکانی بگرێت و بیکاتە سیناریۆیەکی پێشوەختە بۆ نێو ڕای گشتیی عەرەبی و کوردستانی، بۆ ئەوەی شەڕی پۆستەکانی لە بەغدا پێ گەرم بکات”.
ئەو لێکۆلەرەی پرسە ستراتیژییەکان ئاشکرایشی کرد: ”بەر لە ھەموو ھێزە سیاسییەکانی عێراق، یەکێتی باش دەزانێت کە پارتی سەرچاوەی بەھێزکردنی پێکەوەژیانی سەرجەم نەتەوە و پێکھاتە و ئایینەکانە، بەغداش دەزانێت کە کارنامەی پارتی چییە، ھەمیشە پەروەردەی پارتییش وایە کە سووکایەتی بە ھیچ ڕەمز و موقەدەساتێکی سیاسی و ئایینی ناکات، ڕوونکردنەوەکەی نووسینگەی مەرجەعی باڵای شیعە ڕوونە و دەرخەری ئەم ڕاستییەیە کە ئەوان لەم سووتانەی بارەگای پارتی لە بەغدا بێئاگان، ھەرخۆی کولتووری سووتاندنی بارەگای حزبی لە سلێمانییەوە لەلایەن ھێزێکی ناتێگەیشتووی سەربازی و میلیشیایی لەدایک بووە کە بەشێک لە باڵی سەربازیی یەکێتی و پەکەکە لە سلێمانی لە ساڵانی ڕابردوو ئەو کارەیان دەکرد بۆ نانەوەی فەوزا و بە ئامانجگرتنی پارتی وەک فشارێکی سیاسی، بۆیە نانەوەی فەوزا لە بابەت گەورەکردنی ڕووداوەکانەوە پیشەی بەشێک لە میدیای یەکیتییە و ئەمەش بەڵگەی نەخۆشکەوتنی ئەو میدیایەیە”.
تەنیا کوردی كه بۆ باسنيوز قسه‌ى كردووه گوتیشی: ”ھەرخۆی ئەم ئاگرەی بەشێک لە میدیای یەکێتی دەیەوێت لە بابەت نانەوەی فیتنەی ئایینی کاری لەسەر بکات، لە زیانی کوردستانە و لە زیانی ئەو جوگرافیایەشە کە لە سلێمانی یەکێتی بەرپرسیارێتیی تێیدا ھەیە، بۆیە پێویستە وردبینیی سیاسییان بەھێز بکەن و ھەمیشە بگەڕێنەوە بۆ لۆژیک، ھیچ لۆژیکێک لەمەدا نییە کە میدیایەک بەڕێ بکەی بۆ نانەوەی فیتنەی ئایینی لە بەرگی سیاسیدا، بەڵام ڕای گشتیی کوردستان و ھێزە سەرەکییەکانی عێراق ئەو ڕاستییە دەزانن کە لەم تەوقیتەدا کامانەن ئەوانەی دەیانەوێت لە بەرەی لۆژیکدا بن، ئەوانەیشی کە دەیانەوێت فەوزا بخولقێنن، دواجار ھەمیشە ھێزی لۆژیک سەر دەکەوێت بەسەر ھەموو ئەو تەحلیلە نادروستانەی کە میدیایەک دەیەوێت بۆ ڕووداوەکان بیدوورێت”.
