گوتەبێژی سەدر: پەیوەندیی نێوان سەماحەتی سەدر و سەرۆك بارزانی بەهێزە و بەردەوامیش دەبێت
لە لێدوانێکدا بۆ دەنگی ئەمریکا گوتەبێژی فەرمی ڕێبەری ڕەوتی سەدر، جەخت لەسەر بەردەوامبوونی ڕێککەوتنە سێ قۆڵیەکەیان لەگەڵ پارتی و عەرەبی سونە دەکاتەوە، دووپاتی دەكاتەوە ئەوان پێداگیرن لەسەر پێکهێنانی حکوومەتی زۆرینەی نیشتمانی.
سەڵاح عوبەیدیئاشکرای دەکات : “سەید موقتەدا 40 ڕۆژی وەکو دەرفەت دایە لایەنەکانی تر تا حکوومەت پێکبهێنن و عێراق لە چەقبەستوویی ڕزگاری بێت، تەنانەت ئەگەر کوتلەی سەدریش ببێتە ئۆپۆزسیۆن بە ڕۆحی وەرزشیەوە وەریدەگرین، بەڵام هەنگاونان بۆ نزیکبوونەوە لە لایەنەکانی تر لە پێناو دەستبەرداربوون لە حکوومەتی زۆرینە لە ئارادا نیە، تا ئێستا سەید موقتەدا پێداگیرە لەسەر ئەوەی حکوومەتی داهاتووی عێراق زۆرینە بێت، جا لەلایەن هەر لایەکەوە پێکبهێنرێت”.
لە بەشێکی دیکە لە قسەکانیدا سەڵاح عوبەیدی گوتی: “گەر لایەنەکانی تر، توانیان حکوومەتی زۆرینە بەبێ ڕەوتی سەدر پێکبهێنن، پشت بەخوا کوتلەی سەدری دەبێتە ئۆپۆزسیۆن.”
گوتەبێژی فەرمی موقتەدا سەدر راشیگەیاند: “پەیوەندی لە نێوان سەماحەتی موقتەدا سەدر و سەرۆك بارزانی تا ئێستا بەهێزە”.
لە کۆتاییشدا عوبەیدی نایشارێتەوە کە “فشار هەیە لەلایەن لایەنی ناوخۆ و دەرەکیشەوە، بەڵام تا ئێستا هاوپەیمانێتی سێ قۆڵی بەردەوامە، پەیوەندی شەخسیش لە نێوانمان بەهێزە”.
