پۆلیسێن دهۆکێ: ئەو مینا ب دو گەشتیارێن دانیمارکی ڤە پەقی ژ ئالیێ پەکەکێ ڤە هاتیە چاندن
پۆلیسێن دهۆکێ بەیانەک ل دۆر پەقینا مینەکێ ب دو گەشتیارێن دانیمارکی ڤە بەلاڤ کر و راگەهاند؛ مین ژ ئالیێ پەکەکێ ڤە هاتیە چاندن.
د بەیانا پۆلیسێن دهۆکێ دا کو ئەڤڕۆ هەینی بڵاڤکریە و تێدا هاتیە، د چەند رۆژێن بووری دا دو گەشتیارێن دانیمارکی ب ناڤێن تۆبجۆن هۆبدن و یۆهانس وێلیام کو ژیێ وان 28 سالن ب فەرمی ب رێکا دەرگەهێ سنۆری یێ سەرزێرێ ب پایسکلان ب مەرەما گەشتیاریێ هاتینە هەرێما کوردستانێ.
هەروەسا راگەهاندیە؛ هەردو گەشتیار دەمێ بەرەڤ قەزا ئامێدیێ چووین د رێکێ دا مینەک پێڤە پەقیە و ئێک ژ وان ب ناڤێ تۆبجۆن ژیانا خۆ ژ دەست دایە و بۆ نەخۆشخانەیا دهۆکێ هاتینە ڤەگوهاستن.
پۆلیسان دیار ژی کریە کو پشتی پێرابوونێن یاسایی و ڤەکۆلینان ل جهێ رویدانێ، دیاربوویە کو ئەو مینە ژ ئالیێ پەکەکێ ڤە هاتیە چاندن و بوویە ئەگەرێ تێکدانا رەوشا ئارامیا هەرێما کوردستانێ.
پۆلیسان د بەیانا خۆ دا داخواز ژ خەلکێ هەرێمێ و بیانی ژی کریە کو سەرەدانا وان جهێن گومان ل سەر نەکەن و نڤیسیە،” ڤی کارێ نەوێرەک یێ تێکدەرێن رەوشا ئارامیا کوردستانێ شەرمزار دکەین”.
