یه‌كه‌م حاڵه‌تی تووشبوون به‌ تای خوێنبه‌ربوون له‌ دهۆك تۆماركرا

به‌ڕێوه‌به‌ری گشتی ته‌ندروستی پارێزگای دهۆك دەڵێ یه‌كه‌م حاڵه‌تی تووشبوون به‌ تای خوێنبه‌ربوون له‌ پارێزگاكه‌ تۆماركراوه‌.

د.ئەفراسیاب موسا، بەڕێوەبەری گشتی تەندروستی دهۆك رایگه‌یاند، دوای ئه‌وه‌ی هه‌فته‌ی رابردوو پشكنین بۆ هاوڵاتیه‌ك كرا به‌گومانی تووشبوون به‌ تای خوێنبه‌ربوون، ئه‌مڕۆ ئه‌نجامی پشكنینه‌كه‌ی ده‌رچوو، ده‌ركه‌وت کە گومانلێکراوەکە تووشی ئه‌و نه‌خۆشیه‌ بووه‌ و له‌ئێستاشدا له‌ژێر چاودێری پزیشكدایه‌.

بەڕێوەبەری تەندروستی دهۆك ئەوەشی گوت، “ئه‌و تووشبووه‌ خه‌ڵكی قه‌زای شنگاله‌ و ته‌مه‌نی 34 ساڵه‌، پیشه‌ی جوتیاره‌، هه‌فته‌یه‌ك له‌مه‌وبه‌ر ئاژه‌ڵێكی سه‌ربڕیوه‌ دیاره‌ ئه‌و ئاژه‌ڵه‌ تووشی تای خوێنبه‌ربوون بووه‌، به‌و هۆیه‌وه‌ نەخۆشیەکە گواستراوه‌ته‌وه بۆ جوتیارەکە‌”.