ژمارەیەک لە نوێنەرانی وڵاتان لە ئەنجومەنی ئاسایش سەرکۆنەی هێرشە مووشەکییەکەی سوپای پاسدارانی ئێران بۆ سەر هەولێر دەکەن
لە دانیشتنێکی تایبەتی ئه‌نجومه‌نی ئاسایشی نێوده‌وڵه‌تی لەسەر بارودۆخی عێراق ژمارەیەک لە نوێنەرانی وڵاتان لە ئەنجومەنەکە سەرکۆنەی هێرشە مووشەکییەکەی سوپای پاسدارانی ئێران بۆ سەر هەولێر دەکەن، لەو بارەوە نوێنەری ئیمارات گوتی: “هێرشە مووشەکییەکانی ئێران بۆ سەر هەولێر به توندی سەرکۆنه دەکەین و هێرشە مووشەکییەکانی ئێران پێشێلکردنی سەروەریی عێراق و یاسا نێوده‌وڵه‌تییه‌كانه.”
نوێنه‌ری وڵاتی چینیش گوتی: “سەقامگیریی عێراق سەقامگیریی ناوچەکەیه”.
لای خۆیەوە نوێنه‌ری بریتانیا، سەرکۆنەی هێرشەکانی ئێرانی بۆ سەر هەولێر کرد و گوتی: “ئێمە سەرکۆنەی هێرشەکانی ئێران دەکەین لە دژی هەولێر کە لە مانگی ئاداری رابردوو ئەنجام درا.”
نوێنەری مەکسیک گوتی: “هێرشە مووشەکییەکانی سەر هەولێر جێگەی نیگەرانین.”.
هاوکات نوێنەری وڵاتی ئیرلەنداش گوتی: “هێرشه مووشەکییەکەی سوپای پاسداران بۆ سەر هەولێر سەرکۆنه دەکەین و ئه‌و هێرشه كراوه‌ته سه‌ر خاكی وڵاتێكی خاوه‌ن سه‌روه‌ری، کرده سەربازییەکانی وڵاتانی دراوسێ بۆ سەر عێراق پێشێلکارییەکی ئاشکرایه.”
نوێنه‌ری فه‌ره‌نساش گوتی: “هێرشه مووشەکییەکانی ئێران پێشێلکردنی سەروەریی عێراقه.”
