وەزارەتی دارایی چەند بڕیارێکی دەرکرد

بە ئامانجی بوژاندنەوەی جوڵەی بازرگانی و زیادکردنی داھات و کەمکردنەوەی بارگرانی و ئاسانکاری لەسەر ھاووڵاتییان و بازرگانان وەزیری دارایی 10 بڕیار دەردەکات.

لە ڕاگەیاندراوێکدا وه‌زارەتی دارایی و ئابووریی حكوومه‌تی هه‌رێمی كوردستان، ڕایگەیاند، ئەمڕۆ پێنجشەممە 2022/6/2، ئاوات جەناب نوری، وەزیری دارایی و ئابوری ھەرێم، بە یاوەری یاسین واحید، بەڕێوەبەری گشتی دیوانی وەزارەت و بە ئامادەبونی ساماڵ عەبدولرەحمان، بەڕێوەبەری گشتی گومرکی ھەرێم و سەرپەرشتیاری دەروازەی نێودەوڵەتی پەروێزخان و نوێنەری سەرپەرشتیاری ئیدارەی گەرمیان و نوێنەری سەرجەم بنکەجیاوازەکانی ناو دەروازەکە و نوێنەری بازرگانانی سنوری ئیدارەکە کۆبوونەوەیەکی بەرفراوانی ئەنجامدا.

لە ڕاگەیێندراوەکە هەروەها هاتووە، له‌ كۆبوونه‌وه‌كه‌دا، وەزیری دارایی و ئابووری ڕایگەیاند: “لەژێر ڕۆشنایی بەدواداچون و ئامارەکانی بەردەست جوڵە بازرگانی و گەشتیارییەکان لە ڕێگەی دەروازەکەوە بەڕێژەیەکی بەرچاو کەمی کردووە و ئەوەش کاریگەری راستەوخۆی هه‌بووه‌ لە کۆکردنەوەی داھات و مووچەی مووچەخۆران و بودجەی پرۆژەکان”.

وەزیری دارایی داواشی کرد کە ھەموو لایەنە پەیوەندیدارەکان ھەماھەنگ و ھاوکاربن لە بوژاندنەوەی جوڵەی بازرگانی و کارئاسانی بۆ بازرگانانی ناوخۆیی بەپێی ڕێنمایی و ڕێکارە ئیداری یاساییەکانی وەزارەتی دارایی و ھەموو جۆرە قۆرخکارییەک کۆتایی پێبھێندرێت ئەوەش لەپێناو ڕەخساندنی ھەلی بازرگانی و ھاوردەکردن و ھەناردەکردن بۆ سەرجەم بازرگانان بەبێ جیاوازی.

لە راگەیاندراوەكە ئەوەش ئاشكرا كراوە ئاوات جەناب نوری، وەزیری دارایی و ئابووری حکوومەتی ھەرێمی کوردستان، ئەم بڕیارانەی دەركرد:

1- لەمەودوا بارەکانی ترانزێت کڵۆم دەکرێت و بەبێ مەئمور بەڕێدەکرێت.

2- بازرگانان ئازادن لە بازرگانی کردن و حساباتی ڕەسیدیان لەگەڵ ناکرێت.

3- لابردنی ڕەسید بۆ ھەموو ئەو بارانە كە لە دەروازەكان هاوردە دەكرێت.

4- پیاداچوونەوە دەكرێت بۆ کەمکردنەوەی باجی گومرک.

5- پێداچونەوە بە لێخۆشبونی 202 ماددە کە حکوومەتی عێراق لێخۆشبونی بۆ کردووە.

6- تەسریحەی گومرکی تەنھا یەک جار پارە وەردەگیرێت واتا لە دوو بارە بونەوە هیچ بڕه‌ پارەیه‌ك وەرناگیرێت.

7- کرێی بارھەڵگرەکان مەرزی پەرویزخان ڕێکدەخرێتەوە.

8- پێداچونەوە بەکرێی پشكنینی كومپانیاكانی کوالیتی کۆنترۆڵی دەروازەكان دەکرێت.

9- پێداچونەوە بە پاراستنی بەروبومی ناوخۆیی دەکرێت لەگەل وەزارەتە پەیوەندیدارەكان.

10- لە سەر راسپاردەی وەزیری دارایی و ئابوری دابینکردنی 200 دۆنم زەوی بۆ کۆگاکانی بازرگانان كە ئەمیش دەبێتە هۆی رەخساندن 2000 هەلی كار بو ناوچەی گەرمیان.