یه‌كێتی ئه‌وروپا به‌فه‌رمی بڕیاری قه‌ده‌خه‌كردنی كڕینی نه‌وتی ڕووسیای واژوو كرد
یه‌كێتی ئه‌وروپا ئه‌مڕۆ هه‌ینی به‌فه‌رمی بڕیاری قه‌ده‌خه‌كردنی كڕینی نه‌وتی ڕووسیای له‌لایه‌ن وڵاتانی ئه‌وروپاوه په‌سند كرد.
باره‌گای یه‌كێتی ئه‌وروپا له به‌یاننامه‌یه‌كدا ئاشكرای كرد كه به‌شێوه‌ی هه‌نگاو به‌هه‌نگاو له ماوه‌ی 6 مانگی داهاتوودا بڕیاری قه‌ده‌خه‌كردنی كڕینی نه‌وتی ڕووسیا له‌لایه‌ن وڵاتانی ئه‌وروپاوه به‌ته‌واوی جێبه‌جێ ده‌كرێ، هه‌روه‌ها قه‌ده‌خه‌ی كڕینی به‌رهه‌مه‌كانی تری پڕۆتۆكیمیاوی له ماوه‌ی 8 مانگی داهاتوودا ده‌كه‌وێته بواری جێبه‌جێكردنه‌وه.
ڕاشیگه‌یاند: ڕه‌نگه ئاسانكاری بۆ هه‌ندێ وڵاتانی ئه‌وروپی بكرێ له‌وانه هه‌نگاریا و چیك و سلۆڤاكیا كه كێشه‌ی پێداویستی نه‌وت و به‌رهه‌می نه‌وتییه‌كانیان هه‌یه بۆ ئه‌وه‌ی هه‌ندێ له پێداویستییه‌كانیان به به‌رهه‌می نه‌وتی ڕووسیا پڕ بكه‌نه‌وه.
هه‌روه‌ها ڕایگه‌یاند: جگه له‌و وڵاتانه به‌شێوه‌یه‌كی كاتی ئاسانكاری بۆ بولگاریا و كڕواتیاش ده‌كرێ.
یه‌كێتی ئه‌وروپا ئاماژه‌ی به‌وه‌دا كه به‌گوێره‌ی په‌سندكردنی بڕیاره‌كه ڕێگه له ڕووسیا ده‌گرن بۆ فرۆشتنی نزیكه‌ی 90%ی به‌رهه‌مه نه‌وتییه‌كانیان تا كۆتایی ئه‌مساڵ.
یه‌كێتییه‌كه هه‌روه‌ها ڕێگه‌ی له چه‌ندان بانك و كۆمپانیای ڕووسیش گرت له وڵاتانی ئه‌وروپا مامه‌ڵه و كار گواستنه‌وه و گۆڕینه‌وه‌ی دراو بكه‌ن له‌وانه‌ش بانكی سبیربانك، بانكی متمانه‌ی مۆسكۆ، بانكی كشتوكاڵی ڕووسی، بانكی متمانه‌ی بیلاڕووسیا.
